Almaty qalalyq soty para alǵany úshin sottalǵan Kentaýdyń burynǵy ákiminiń apellıasııalyq shaǵymyn qanaǵattandyrmady, dep habarlaıdy Egemen.kz.
Almaty qalalyq sotynyń qylmystyq ister jónindegi alqasy Kentaý qalasynyń burynǵy ákimi Dáýren Mahajanovtyń advokattarynyń apellıasııalyq shaǵymyn qarady.
Sýdıa Fedotovanyń tóraǵalyq etýimen alqa ashyq sot otyrysynda Mahajanovqa, Túmebaevqa jáne Bobryshevqa qatysty qylmystyq isti qarap, olardyń advokattarynyń qylmystyq ister jónindegi mamandandyrylǵan aýdanaralyq sotynyń 13 shildedegi úkimine shaǵymy negizinde kelip túsken, Qylmystyq is júrgizý kodeksiniń 431-babynyń 1-bóliginiń 1-tarmaǵymen sottalǵandarǵa qatysty úkim ózgerissiz qaldyryldy. Qorǵaýshylardyń apellıasııalyq shaǵymy qanaǵattandyrylǵan joq», dep habarlady sýdıa Irına Fedotova.
Aıta keteıik, para alý boıynsha deldaldyq jasaǵany úshin kináli dep tanylyp sottalǵandar Túmebaeva men Bobryshevaǵa qatysty úkimniń zańdy kúshine engen bóligi naqtylanyp, qamaýǵa alynyp bas bostandyǵynan aıyrylǵanǵa deıin qamaýda bolǵan ýaqyt bir táýlikke esepteldi. Sottyń qaýlysy zańdy kúshine endi. Ol bir jyl ishinde kassasııalyq satyda qaralýy múmkin.
Eske salaıyq, 13 shildede Kentaý qalasynyń burynǵy ákimi Dáýren Mahajanovqa qatysty sot prosesi aıaqtaldy. Oǵan Kentaý qalasyndaǵy MJÁ jol jóndeý seriktestiginiń dırektorynan 42 500 000 teńge kóleminde para aldy dep aıyp taǵyldy. Sot ony kináli dep taýyp, 10 jylǵa bas bostandyǵynan aıyrdy.