Otandyq kınoóndiristiń máselesi qaı ýaqytta da ózekti. Básekege qabiletti hám suranysqa ıe fılm túsirý búgingi qazaq kınosynyń negizgi maqsaty bolyp otyr. Osy oraıda Mádenıet jáne sport mınıstri Dáýren Abaev kınorejısserlermen kezdesip, «Qazaqfılm» kınostýdııasyn jańǵyrtý jáne kınematografııa salasyndaǵy zańnamany jetildirý jumystaryn, sondaı-aq atalǵan saladaǵy birqatar máseleni talqylady.
Kınematografıster odaǵynyń basqarma tóraǵasy Ermek Tursynov júrgizgen basqosýǵa Doshan Joljaqsynov, Tuńǵyshbaı Jamanqulov, Rashıd Nuǵmanov, Qanat Tórebaı, taǵy basqa kıno mamandary qatysty.
Kezdesýdiń basty suraqtarynyń biri – konkýrstyq irikteýge qatysýshylarǵa arnalǵan qarjylyq turaqtylyq talaby. Sala ókilderiniń aıtýynsha, bul kóptegen kompanııalardyń memlekettik qoldaýǵa ıe bolýyna kedergi keltiredi.
«Bul talapty Qarjy mınıstrligi berdi. Qazirgi ýaqytta kınoóndiris ókilderiniń paıdasyna máseleni qarastyryp jatyrmyz. Bizdiń tarapymyzdan kıno men jalpy osy salany damytý úshin barlyq kúsh-jiger jumsalady», dedi Dáýren Abaev.
Aıta keteıik, bıyl konkýrstyq irikteý qorytyndysy boıynsha 62 kınojoba memlekettiń qarjylandyrýyna ıe boldy. Bul rette saraptamalyq keńestiń quramy 80%-ǵa jańartyldy. Konkýrsty ótkizýdiń ashyqtyǵyn qamtamasyz etý úshin qorǵaýdyń barlyq prosesi onlaın-translıasııa arqyly júrgizildi.
«Eger 2020 jyly memleket 39 jobany qoldasa, bıyl eki ese kóp – 62 kartına qarjylandyryldy. Pıtchıng nátıjelerine saı irikteýden ótkenderdiń kópshiligi – jas rejısserler. Olar kıno álemine alǵash qadam jasaǵandar. Biz jas mamandardyń jarqyrap tanylýlaryna múmkindik berýimiz kerek», dedi mınıstr.
Sonymen qatar qatysýshylar anımasııalyq fılmder óndirisi týraly da sóz qozǵady. Atap aıtqanda, kınostýdııa ókilderi ınternet-keńistikte qazaq mýltfılmderiniń joǵary tanymaldylyǵyn atap ótti.
«Men osyǵan deıin de balalarǵa sapaly jáne kórýge laıyqty anımasııalyq fılmder qajet ekenin aıttym. Bıyl «Qazaqfılm» kınostýdııasynyń bazasynda «Qazaqanımasııa» shyǵarmashylyq birlestigi qurylady. Jyl sońyna deıin keminde on pılottyq anımasııalyq jobany usyný josparlanyp otyr. Memleket anımasııa salasyndaǵy kreatıvti ıdeıalar men jobalardy qoldaýǵa daıyn. Bul jumys óz jemisin beretinine jáne básekege qabiletti otandyq ónim alatynymyzǵa senimdimin», dep atap ótti mınıstr.
Sondaı-aq kıno salasyndaǵy qoldanystaǵy zańnamany ózgertý máselesi kóterildi. Dáýren Abaevtyń aıtýynsha, Mádenıet jáne sport mınıstrligi kásibı mamandar men tájirıbeli sarapshylar qaýymdastyǵymen birlesip, zańnamalyq bazaǵa túzetýler men usynystar engizý baǵytynda jumys isteýge daıyn.