Shymkent qalalyq balalar klınıkalyq aýrýhanasynyń hırýrgteri aıaǵynyń qan tamyry kesilgen 5 jasar balaǵa tyń ádispen kúrdeli ota jasady, dep habarlaıdy Egemen.kz Shymkent qalasy ákimdiginiń baspasóz qyzmetine silteme jasap.
21 tamyz kúni jedel járdem qyzmetimen naýqas bala aýyr jaǵdaıda qalalyq klınıkalyq balalar aýrýhanasyna jetkizilip, oń tize astynan qan ketý, aıaqtyń tizeden tómen bóliginiń kógerýi, muzdaýy syndy belgilermen jansaqtaý bólimine jatqyzylǵan.
Mamandar oń tize asty arterııasy men venasynyń tolyqtaı kesilgenin anyqtady. Balaǵa shuǵyl túrde ota jasalmasa, aıaǵyndaǵy jaraqaty asqynyp múgedek bolyp qalý qaýpi basym edi. Osyny eskergen tájirıbeli angıohırýrg, anestezıolog dárigerler jedel ota jasady.
Hırýrgtar naýqas baladaǵy tamyrlarynyń dıametriniń kishkentaı bolýyna baılanysty, mıkroskopııalyq LEICA ONX apparatynyń kómegimen ota jasaǵan. Operasııa kezinde mamandar úzilgen tize asty arterııasyn ushpa-ush jalǵap tigip berdi.
«Otadan keıin aıaqtyń tómengi bóligine qan baryp, jylyp, tobyq aımaǵynda pýls paıda boldy. Balanyń qazirgi jaǵdaıy qanaǵattanarlyq, úıge shyǵýǵa daıyndalyp jatyr. Tamyrdyń jaraqatyna der kezinde joǵarǵy medısınalyq kómekti durys kórsetpegen jaǵdaıda, kóbine dıstaldy bóligi ampýtasııamen aıaqtalýy múmkin. Ata-analarǵa balalaryna kóńil bólip, qaýipsizdik sharalaryn saqtap júrýge shaqyramyz», deıdi bólim meńgerýshisi Oljas Shyntasov.