Dúnıejúzilik densaýlyq saqtaý uıymy (DDU) álemde maımyl sheshegin juqtyrý 21 paıyzǵa tómendegenin málimdedi, dep habarlaıdy Egemen.kz Reuters agenttigine silteme jasap.
DDU-nyń epıdemıologııalyq esebine sáıkes, 15-21 tamyz aralyǵynda ótken aptamen salystyrǵanda aýrý 21 paıyzǵa azaıǵan.
«Qoǵamdyq densaýlyq saqtaýdyń tıimdi sharalary men vaksınasııanyń arqasynda Eýropada indet juqtyrý baıaýlady», dedi DDU bas dırektory Tedros Adhan Gebreıesýs.
Alaıda AQSh-ta maımyl sheshegin juqtyrýdyń joǵarǵy ósimi baıqalady. Sondaı-aq, dúnıejúzilik jaǵdaılardyń 34 paıyzdan astamy Amerıka Qurama Shtattarynda ekeni atap ótildi.
Dúnıejúzilik densaýlyq saqtaý uıymynyń málimeti boıynsha, búginge deıin maımyl sheshegi 96 elde anyqtalyp, 41 myńnan astam jaǵdaıy tirkelgen.