QR IIDM Azamattyq avıasııa komıtetiniń tóraǵasy Vetnam men Qazaqstan arasyndaǵy jolaýshy reısterin jańǵyrtý týraly vetnamdyq tarappen kelisim jasalǵanyn málim etti, dep habarlaıdy Egemen.kz.
QR IIDM Azamattyq avıasııa komıtetiniń baspasóz qyzmeti habarlaǵandaı, vedomstvo tóraǵasy Talǵat Lastaev Vetnam Sosıalıstik Respýblıkasynyń Qazaqstandaǵy Tótenshe jáne ókiletti elshisi Fam Thaı Ny Maı jáne «Vietjet Air» áýe kompanııasynyń ókili Ngýen Chı Tammen kezdesti.
«Kezdesý barysynda Vetnam tarapy Qazaqstanǵa turaqty jolaýshylar reısterin oryndaýǵa daıyndyǵyn bildirdi», delingen komıtet habarlamasynda.
10 qazanda Kamran – Almaty baǵyty boıynsha «Vietjet Air» áýe kompanııasynyń alǵashqy reısin ashý josparlanyp jatyr. Sonymen qatar avıakompanııa Kamran qalasynan Nur-Sultan qalasyna reıster ashýdy josparlap otyr. Reıster Airbus A-330 tıpti áýe kemelerinde aptasyna 2-3 ret jıilikpen ushatyn bolady.
«Qazirgi ýaqytta «Vietjet Air» avıakompanııasy Qazaqstan aýmaǵynda sheteldik avıatasymaldaýshy retinde akkredıtteýden ótýge daıyndalýda. Taraptar eki el arasyndaǵy saýda-ekonomıkalyq, ınvestısııalyq, týrıstik jáne mádenı yntymaqtastyqty odan ári damytý úshin tikeleı áýe qatynasynyń mańyzdylyǵyn atap ótti», delingen habarlamada.
Kezdesý qorytyndysy boıynsha taraptar Qazaqstan men Vetnam arasyndaǵy tikeleı turaqty áýe qatynasyn jańartý jónindegi jumysty jalǵastyrýǵa kelisti.