Nıý-Iorkte ótip jatqan AQSh-tyń ashyq birinshiliginiń ekinshi kezeńinde qazaqstandyq tennısshi Aleksandr Býblık Ispanııanyń ókili Pablo Karreno Býstamen kúsh synasty.
31 jastaǵy Pablo Karreno ATR týrnırlerin jeti márte utyp, 2017 jáne 2020 jyldary dál osy jarystyń jartylaı fınalynda óner kórsetti. Rolan Garrostyń shırek fınalyna deıin jetip, bıyl Aýstralııanyń ashyq birinshiliginiń tórtinshi kezeńinde súrindi. Byltyr Tokıoda alaýy tutanǵan Olımpııa oıyndarynda qola medaldy qorjynǵa saldy. Kezinde US Open dodasynyń juptyq saıysynyń fınalynda óner kórsetti. Qazirgi kezde Býsta álemdik reıtıngte 14-oryndy ıelenýde. Bul oıynshynyń joly Býblıkpen úsh márte qıysyp, sol básekelerdiń barlyǵynda ıspanııalyq oıynshy jeńiske jetken edi. Bul joly da sol jaǵdaı qaıtalandy. Eki tennısshi bir-birimen úsh saǵat boıy aıqasty. Nátıjesinde, Pıreneı túbegi ókiliniń mereıi ústem boldy. Esep – 4:6, 6:4, 6:3, 7:6.
Bıylǵy AQSh-tyń ashyq birinshiligi tosyn nátıjelerge toly bolaıyn dep tur. Buǵan deıin biz rýmynııalyq Sımona Halep, reseılik Darıa Kasatkına, grekııalyq Stefanos Sısıpas syndy sańlaqtar tusaýkeser kezdesýlerinde súringeni jaıynda jazdyq. Ile-shala Emma Radýkaný da jeńilistiń kermek dámin tatty. Byltyr US Open týrnırinde aldyna jan salmaǵan Ulybrıtanııanyń arýy álemdik reıtıngte ózinen áldeqaıda tómen turǵan fransııalyq Alıze Kornege ese jiberdi.
Taǵy bir aıta keterlik jaıt, atalǵan jarystyń jasóspirimder arasyndaǵy týrnırinde Qazaqstannyń úsh birdeı óreni baq synaıdy. Olar – Maksım Batıýtenko, Arýjan Saǵyndyqova jáne Sandýǵash Kenjebaeva. Bul oıynshylardyń barlyǵy da Team Kazakhstan akademııasynyń túlekteri. Jas órenderdiń dodasy 4-10 qyrkúıek aralyǵynda ótedi.