Qarýly adam Argentınanyń burynǵy prezıdenti jáne qazirgi vıse-prezıdenti Krıstına Kırshnerge belgisiz bireý qarý kezengen, dep habarlaıdy Egemen.kz.
Shabýyl jasaýshy ustaldy. Abyroı bolǵanda, Krıstına Kırshner zardap shekken joq.
Oqıǵa Býenos-Aıres aımaǵyndaǵy vıse-prezıdent úıiniń janynda bolǵan. Kırshner jaqtastarymen sóılesip jatqanda, kópshiliktiń arasynan belgisiz bireý oǵan qaraı tapanshasyn kózdegen. Ol shúrippeni basqanymen, myltyq jumys istemeı qalǵan. Osy sátte ony qaýipsizdik qyzmetiniń qyzmetkerleri ustap úlgergen.
Aldyn ala málimet boıynsha, er adamnyń 35 jastaǵy Brazılııa azamaty Fernando Andres Sabag Montıel ekeni anyqtaldy. Ol Bersa Thunder 380 ózdiginen zarıadtalatyn tapanshamen qarýlanǵan.
Aıta keteıik, Argentınada Krıstına Kırshner sybaılas jemqorlyqqa qatysy bar dep aıyptalǵan. Ol prezıdent qyzmetin atqarǵan 2007-2015 jyldary ınfraqurylymdyq jobalardy júzege asyrý boıynsha qylmystyq shemanyń uıymdastyrýshysy degen kúdikke ilingen. Is boıynsha taǵy 12 aıyptalýshy bar. Tamyz aıynda ótken sot otyrysynda prokýror Krıstına Kırshnerdi 12 jylǵa bas bostandyǵynan aıyrýdy jáne 1 mıllıard dollar aıyppul tóleýdi, sondaı-aq ómir boıy memlekettik qyzmette jumys isteýge tyıym salýdy suraǵan.