Jýyrda Qazaqstan Halyq partııasy Kishi Taldykóldiń máselesine arnalǵan dóńgelek ústel ótkizdi. Atalǵan kóldiń qazanshuńqyry arnaıy tehnıkalar arqyly qurǵatylyp, mańaıyna kópqabatty turǵyn úı keshenderi boı kóterip jatqanyna baılanysty ekologter men turǵyndar tabıǵı ortany saqtaý týraly máseleni udaıy kóterip kele jatqany belgili. Olardyń aıtýynsha, tabıǵı saıabaq qurýǵa suranyp turǵan bul aýmaqtaǵy qurǵatý jumystary qorshaǵan ortaǵa aıtarlyqtaı zııan keltiredi. Osy oraıda belsendiler «Qala derti 6» núkteli qurylys máseleleri týraly onlaın-efıriniń kezekti shyǵarylymyn Kishi Taldykól máselesine arnady.
Qazaqstannyń bıoalýantúrlilikti saqtaý qaýymdastyǵynyń ǵylymı qyzmetkeri Rýslan Orazalıevtiń aıtýynsha, 2012 jyly uıym qalalyq ákimdikke sýly-batpaqty alqaptar bazasynda qalalyq saıabaq qurý tujyrymdamasyn usynyp, Kishi Taldykóldiń ekojúıesin saqtap qalǵan-dy. Biraq 2020 jyly kenetten jeti kóldiń bireýin jasandy jolmen joıyp, ornyn toltyrý jumystary bastaldy.
«Búginde kól joq. Kóldiń ortasynda 12 qabatty úıler salyndy. Oǵan qosymsha balalar ortalyǵynyń qurylysy júrgizilýde. Sonymen qatar joba boıynsha mektep, áleýmettik nysandar da boı kótermek. Al kóldiń ornyn qurylys qoqystarymen toltyrdy. Meniń oıymsha, bul qaýipti. Tipti qurylys erejelerine de sáıkes kelmeıdi. Bul máseleni ákimdikte kótergen kezde, maǵan: «sol jaǵalaýdyń barlyǵy qoqys ústine salynǵan» dep jaýap berdi», deıdi R.Orazalıev.
Quqyq qorǵaýshy Shyńǵys Temir qazirgi ýaqytta belsendilerde Kishi Taldykóldi saqtaý týraly sottyń úsh sheshimi bar ekenin aıtty. О́kinishke qaraı, bılik ony oryndaýǵa qulyqsyz.
Ekologııa mınıstrliginiń ókili Serikjan Beketaev óz kezeginde vedomstvo ákimdikten zań boıynsha kól boıynda sý qorǵaý aımaǵy men jolaqtaryn ornatýdy birneshe ret suraǵanyn aıtty. Áıtkenmen, qala ákiminiń sý qorǵaý beldeýin belgileý týraly qaýlysy shyqpaǵan.
«Sý qorǵaý beldeýi belgilengen jaǵdaıda, osy aýmaqtaǵy barlyq sharýashylyq áreket Ekologııa mınıstrligimen kelisilýge tıis. Biraq qaýly joq bolǵandyqtan, biz ákimdiktiń áreketin teksere almaımyz», dedi ol.
Al «AstanaBasJospar» JShS qyzmetkeri Amanjol Chıkanaevtyń aıtýynsha, qalanyń bas josparynyń jobasynda ońtústik-batys jelderinen qorǵaıtyn orman-saıabaq aımaǵyn qaldyrý qarastyrylǵan.
«Biz 2000 jyldardyń basynda osy aýmaqta ekologııalyq qalalyq saıabaq qurýdy qarastyratyn bas jospar ázirledik. Onyń ońtústik bóliginde ár kontınenttiń janýarlar álemin kórsetý úshin kúmbezderi bar haıýanattar baǵyn qurý júıelengen. Al soltústik bóligin qaraquıryqtar, kıikter, qulandar jáne Qazaqstan dalasynyń basqa da janýarlary jaıylýy úshin savanna tárizdi ashyq jerge qaldyrdyq. Osy baǵytta bizdiń sáýletshi óte jaqsy maket jasady. Sodan keıin bul ıdeıa qarajat bolmaǵandyqtan iske aspady. Biz bul aýmaqty bolashaqta ekologııalyq saıabaqqa aınalatyn jasyl aımaq retinde ustadyq», dedi sáýletshi.
Ekologterdiń aıtýynsha, Kishi Taldykól aýmaǵynda jándikterdiń 300-den astam túri, balyqtyń eki túri, qosmekendiler men baýyrymen jorǵalaýshylardyń úsh túri, sútqorektilerdiń 10 túri jáne qustardyń 172 túri mekendeıdi.
Endigi kezekte kóldiń florasy men faýnasyn zertteý kerek. Sonymen birge mamandar osy aýmaqtaǵy jerasty jáne jerústi sýlarynyń salynyp jatqan nysandardyń sapasyna áserin túbegeıli zertteýdi talap etedi. Sarapshylardyń aıtýynsha, jerasty sýlary jınalatyn bul kólde boı túzegen kópqabatty turǵyn úı keshenderiniń qurylysy adamdardyń ómirine qaýip tóndiredi.
Dóńgelek ústelge qatysýshylar Kishi Taldykól kóliniń qalǵan tobyn áli de saqtap qalýǵa bolatyny týraly ortaq pikirge keldi.