Elordalyq talǵampaz kórermendi eleń etkizgen eleýli jańalyq bıyl nebári ekinshi maýsymynyń shymyldyǵyn túrgeli otyrǵan elimizdegi eń jas óner ordasy – Túrkistan mýzykalyq drama teatrynyń bas shahar tórindegi tabysty ótken gastroldik sapary desek, qatelespeımiz. Alystan at arytyp jetken jas óner ujymy «Astana Opera» teatrynyń Úlken zaly sahnasynda eki kún qatarynan Qazaqstannyń eńbek sińirgen qaıratkeri, jazýshy-dramatýrg Ermek Amanshaevtyń lıbrettosyna qoıylǵan belgili reseılik baletmeıster, ónertanýshy Konstantın Semenovtyń «Qorqyt týraly ańyz» plastıkalyq spektaklin usyndy.
– Túrkistan mýzykalyq drama teatrynyń ashylǵanyna kóp ýaqyt ótpese de, teatrymyz qazirdiń ózinde respýblıka kólemine tanymal bola bastady. Bul – bizdiń ujymnyń elordaǵa jasaǵan ekinshi gastroldik sapary. Osyǵan deıin Q.Qýanyshbaev atyndaǵy memlekettik akademııalyq qazaq mýzykalyq drama teatry sahnasynda astana halqyna arnap jazýshy, dramatýrg, Memlekettik syılyqtyń laýreaty Dýlat Isabekovtiń «Bórte» tarıhı dramasyn qoısaq, endi mine, araǵa az ǵana ýaqyt salyp «Qorqyt týraly ańyz» qoıylymyn usynyp otyrmyz. «Astana Operanyń» tamasha sahnasynda óner kórsetý – biz úshin úlken mártebe. Al zamanaýı bı men operany biriktirgen spektaklimiz bas qalanyń talǵampaz kórermenderiniń kóńilinen shyqty dep senemiz, dedi Túrkistan mýzykalyq drama teatrynyń dırektory ári kórkemdik jetekshisi Aınur Kópbasarova.
Teatr basshysy A.Kópbasarovanyń jetekshiligimen rýhanı astananyń sálemin arqalap jetken aıtýly spektakl kóshpeli halyqtardyń tarıhynda tereń iz qaldyryp, qundy ádebı-mýzykalyq mura jasaǵan ańyz adam Qorqyt atanyń ómirinen syr shertedi. Lıbretto jelisine sáıkes, qobyzynyń únimen tirshilikti terbetken kúı atasy – Qorqyt pen jer betin arazdyq alańyna aınaldyrýǵa tyrysqan sıqyrshy Martýdyń arasyndaǵy máńgilik qaqtyǵys zamanaýı horeografııa tilimen áserli beınelenedi.
– Taǵdyry erekshe Qorqyt týraly shyǵarmany qolǵa alǵanda, árıne, basynda kiltin taba almaı biraz qınaldym. Keıin tulǵa ómirin zertteı kele qoıylym negizin mýzyka men plastıkadan izdeýge bekindim. Nege deseńiz, Qorqyttyń ózi de, ómiri de mýzyka emes pe?! Demek spektakldiń de ózegi qobyz únimen órilýi kerek dep túıdim. Sondyqtan da spektakldiń leıtmotıvi – qobyzdyń qońyr úni. Kúmbir únniń aıasynda tulǵa taǵdyryn tolǵadyq. Máńgilik ómir izdegenimen, ólimnen qutyla almaǵan Qorqyt, qobyzynyń arqasynda ekinshi ómirine ólmes taǵdyr syılady. Osy bir fılosofııalyq taqyryp óner adamy retinde meni de qanattandyrdy, – dep «Qorqyt týraly ańyz» spektakli jaıly qoıylymnyń rejısseri ári qoıýshy horeografy Konstantın Semenov syr ashty.
Taǵylymdy týyndyny jaryqqa shyǵarý jolynda qoıýshy horeograftan bólek basqa da kóptegen tájirıbeli mamandar ter tókti. Atap aıtsaq, kompozıtor Hamıt Shańǵalıev, qoıýshy sýretshisi Tatıana Vıýshınskaıa, jaryq boıynsha sýretshi Tatıana Mıshına, beınekontent sýretshisi Sergeı Rylko, kostıýmder boıynsha sýretshiler – Nazym Jaılaýbaeva men Nazym Qarpyqova, dekorator-sýretshi Janat Kókimbekov, baletmeıster Dáýlet Muratpekov, grım boıynsha sýretshi Adel Nurqasymova bastaǵan kásibı sheberler eńbegi de aıryqsha atap ótýge turarlyq sátti izdenister sanatynda dep senimmen aıta alamyz. Oıymyzdy teatr mamandary da qoldady.
– «Astana Operany» Túrkistan mýzykalyq drama teatrymen dostyq ári shyǵarmashylyq qarym-qatynas baılanystyrady. Kópshilikke belgili, bizdiń balet trýppamyz bıyl maýsymda alǵash ret Túrkistanda gastroldik saparmen boldy. Drama teatr sahnasynda ártister XX ǵasyr jaýhary – N.A.Rımskıı-Korsakovtyń mýzykasyna qoıylǵan kemeńger horeograf M.Fokınniń «Sheherazada» baletin jáne balet trýppasynyń kórkemdik jetekshisi, Reseıdiń Halyq ártisi Altynaı Asylmuratovanyń avtorlyq gala-baǵdarlamasyn oryndady. Araǵa eki aı salyp «Astana Operada» jaýap retindegi gastrolmen kıeli Túrkistan qalasynan kelgen ártisterdiń joǵary deńgeıde óner kórsetkenine óte qýanyshtymyz. Jas ta bolsa ózderiniń irgeli shyǵarmashylyq izdenisteriniń nátıjesinde elordalyq talǵampaz kórermenniń ystyq yqylasyna bólenip, joǵary baǵasyn alǵan áriptesterimizdiń ónerine erekshe tántimin, – dedi «Astana Opera» teatrynyń dırektory, Qazaqstannyń eńbek sińirgen qaıratkeri Ǵalym Ahmedıarov.
Eki kún qatarynan bas shahar kórermenderi aldynda Túrkistan mýzykalyq drama teatrynyń Elaman Ábdiqalyq, Erkinbek Áýbákirov, Akylaı Sydyǵalıeva, Alına Ormonbek, Rýstam Shaıhov, Gúljanat Qalamǵazına, Baqytnur Dúısenbaeva, Mao Sakaı, Farhat Sádýaqasov, Dastan Sattar, Ilııa Jarlyqasymov, Alýa Tóregeldi, Kamıla Álimjanova, Mádına Sadýbaeva, Bekarys Qaraǵýlov, Danııar Dosymbek, Almas Jylqybek, Ferıde Tolobaeva, Dáýlet Shomanov bastaǵan talantty ártister toby tabysty óner kórsetti.