Ázerbaıjannyń astanasy – Bakýde karateden tórtinshi Premer-lıga dodasy aıaqtaldy. Bul jarysqa álemniń 58 memleketinen kelgen 350-ge tarta sportshy qatysty.
Kaspıı teńiziniń arǵy jaǵalaýynan Qazaqstannyń ulttyq quramasy oljaly oraldy. Kil myqtylardyń basyn qosqan baıraqty básekede 75 kılo salmaqta kúsh synasqan álem chempıonatynyń eki dúrkin qola júldegeri, Azııa chempıony Nurqanat Ájiqanovqa teń keler eshkim tabylmady. Qarsy kelgenderdi qoǵadaı japyrǵan qazaq karateshisi bas júldeni qanjyǵasyna baılady. 60 kılo salmaqtaǵy Qaısar Alpysbaıdyń da aıaqalysy jaman emes edi. Bastapqy básekeleriniń barlyǵyn jeńispen aıaqtaǵan saqa sportshymyz jartylaı fınalda ese jiberip, qola medaldy qanaǵat tutty. 67 kılo salmaqta saıysqa túsken Dıdar Ámiráli de dál sol mejeden kórindi. Nátıjesinde, jerlesterimiz Bakýdegi básekeni 1 altyn jáne 2 qolamen qorytyndylady.