«Astana» halyqaralyq qarjy ortalyǵynyń alańynda Qazaqstan Respýblıkasy Premer-Mınıstriniń birinshi orynbasary Roman Sklıardyń qatysýymen Qazaqstan-Germanııa bıznes-forýmy ótti, dep habarlaıdy Egemen.kz.
Forým «Jahandyq bıznestiń jańa erejelerine beıimdelý – О́nerkásip, energetıka jáne logıstıkadaǵy ortaq múmkindikter» taqyrybynda ótti.
Is-shara Qazaqstan-Germanııa úkimetaralyq jumys tobynyń teń tóraǵasy, GFR Ekonomıka jáne klımatty qorǵaý federaldyq mınıstrliginiń syrtqy ekonomıkalyq saıasat jónindegi dırektory, doktor Domınık Shnıhels bastaǵan toptyń sapary aıasynda ótti. Sapar barysynda Germanııa delegasııasy Memleket basshysy Qasym-Jomart Toqaevpen de kezdesti.
Bıznes-forýmǵa ortalyq jáne jergilikti memlekettik organdardyń, ulttyq jáne kvazımemlekettik kompanııalardyń basshylary, salalyq jáne óńirlik bıznes qaýymdastyqtarynyń ókilderi, sondaı-aq Siemens, Deutsche Bahn, SAP, Becker Mining Systems AG, Knauf, Wilo t.b. jetekshi nemis kompanııalarynyń basshylary qatysty. Forýmǵa barlyǵy 150 delegat qatysty.
Germanııa - Qazaqstannyń EO-daǵy mańyzdy seriktesteriniń biri. Elder arasynda saýda-ekonomıkalyq yntymaqtastyqty tereńdetýge, ınvestısııalardy yntalandyrýǵa jáne ózara qorǵaýǵa baǵyttalǵan birqatar úkimetaralyq kelisim bar.
2021 jyly Qazaqstan men Germanııa arasyndaǵy taýar aınalymy 2,2 mlrd dollar boldy. Bul ótken jyldyń sáıkes kezeńimen salystyrǵanda (2,1 mlrd dollar) 6,4%-ǵa joǵary. 2005 jyldan beri Germanııanyń Qazaqstan ekonomıkasyna salǵan tikeleı sheteldik ınvestısııasy shamamen 5,3 mıllıard dollarǵa jetti. Onyń basym bóligi óńdeýshi ónerkásipke baǵyttaldy. Sondaı-aq quny 2 mıllıard dollardan asatyn 9 joba júzege asyrylýda.
Is-sharanyń ashylýynda sóz sóılegen Roman Sklıar Memleket basshysy jarııalaǵan «Jańa Qazaqstan» tujyrymdamasy aıasynda josparlanyp otyrǵan saıası jáne áleýmettik-ekonomıkalyq reformalar týraly, Qazaqstan Úkimetiniń ony júzege asyrýdaǵy maqsattary men basymdyqtary týraly habarlady.
«Úkimet eldiń ınvestısııalyq tartymdylyq deńgeıin arttyrý boıynsha turaqty jumys júrgizýde. ESG talaptarynyń joǵarylaýy, jahandyq energetıkalyq jáne tehnologııalyq aýysý jaǵdaıynda Qazaqstannyń ınvestısııalyq tartymdylyǵyn arttyrýǵa basa nazar aýdara otyryp, Qazaqstannyń ınvestısııalyq saıasatynyń jańa Tujyrymdamasynyń jobasy qabyldandy. Innovasııalar salyq rejımderin ońtaılandyrý jáne ońaılatý sharalaryn, ekonomıkanyń basym sektorlaryna ınvestorlardy sýbsıdııalaýdy jáne basqa da yntalandyrýdy qamtıdy», dedi Qazaqstan Respýblıkasy Premer-Mınıstriniń birinshi orynbasary.
Sóziniń sońynda Roman Sklıar nemis kompanııalaryn ınvestısııalyq baılanystardy keńeıtýge, sondaı-aq jańa birlesken ınvestısııalyq jobalardy júzege asyrýǵa belsendi qatysýǵa shaqyrdy.
Qazaqstan-Germanııa úkimetaralyq jumys tobynyń teń tóraǵasy Domınık Shnıhels elder arasyndaǵy ekijaqty qarym-qatynastardyń mańyzdylyǵyna toqtaldy. Sondaı-aq Qazaqstan men Germanııanyń kóptegen salalarda birlesken jobalardy júzege asyrýǵa áleýeti zor ekenin atap ótti.
«О́tken pandemııalyq daǵdarys pen qazirgi geosaıası jaǵdaıdyń mysalyna qaraı otyryp, biz azyq-túlik qaýipsizdiginiń, energııa erkindiginiń jáne taýarlardy jetkizý tizbegin damytýdyń mańyzdylyǵyn kóremiz. Osy turǵydan alǵanda, biz Qazaqstannyń Germanııa úshin ekonomıkanyń kóptegen mańyzdy salalarynda úlken áleýetke ıe ekenin baıqaımyz. Ornalasqan jeri men logıstıkalyq artyqshylyqtarymen qatar Qazaqstannyń orasan zor resýrsy men adamı áleýeti de bar. Yntymaqtastyqty keńeıtý Qazaqstan úshin de, Germanııa úshin de óte tıimdi dep esepteımiz», dedi Domınık Shnıhels.
Sondaı-aq Qazaqstan Respýblıkasy Indýstrııa jáne ınfraqurylymdyq damý vıse-mınıstri Marat Qarabaev, Qazaqstan Respýblıkasynyń Energetıka vıse-mınıstri Jandos Nurmaǵanbetov, «KAZAKH INVEST» UK» AQ basqarma tóraǵasy Meıirjan Iýsýpov jáne AHQO Basqarmasynyń tóraǵasy Ernur Rysmaǵambetov forým barysynda qazaqstandyq taraptyń atynan sóz sóıledi.
KAZAKH INVEST basshysy óz sózinde Qazaqstannyń usynyp otyrǵan ınvestısııalyq múmkindikterine, sondaı-aq memlekettik qoldaý sharalaryna toqtaldy.
«Eýropa men Azııanyń toǵysqan jerindegi strategııalyq ornalasýynyń, iri kórshi naryqtarǵa shyǵýynyń, qolaıly bıznes-ortanyń, qoljetimdi jáne bilikti jumys kúshi men keshendi memlekettik qoldaý sharalarynyń arqasynda Qazaqstan halyqaralyq ınvestorlardyń nazaryn arttyrýdy jalǵastyrýda. Bul bıznes-forým nemis kásipkerleri úshin jańa múmkindikter men perspektıvalar ashatynyna senimdimiz», dedi Meıirjan Iýsýpov.
Sharada sóz sóılegen nemis spıkerleri Qazaqstannyń Germanııaǵa dástúrli energetıkalyq resýrstardy jetkizýdi arttyrý, «jasyl» energııany óndirý jáne keıinnen eksporttaý áleýetin joǵary baǵalady.
Is-shara aıasynda qazaqstandyq tarap ókilderiniń birqatar nemis kompanııasynyń basshylyǵymen ekijaqty kezdesýleri ótti. Kezdesýler barysynda áleýetti birlesken ınvestısııalyq jobalar talqylandy.