Qazaqstandyq delegasııa eldiń energetıkalyq qaýipsizdigi men táýelsizdigin qamtamasyz etý úshin «Paksh» AES keńeıtý boıynsha vengrlik áriptesteriniń tájirıbesimen tanysady, dep habarlaıdy Egemen.kz.
«Samuryq-Qazyna» AQ-nyń Basqarma tóraǵasy Almasadam Sátqalıev pen «Qazaqstandyq atom elektr stansııalary» JShS dırektory Tımýr Jantıkın Býdapeshtte SIM, Energetıka mınıstrligi jáne Vengrııanyń Atom energııasy jónindegi agenttiginiń ókilderimen, sondaı-aq «Paksh» AES jáne EXIM banktiń basshylyǵymen kezdesedi.
Sapar baǵdarlamasynda atom stansııasyna jáne bolashaq jańa energııa bloktarynyń qurylys alańyna barý josparlanǵan.
Qazaqstan ókilderin Vengrııanyń halyqaralyq áriptestermen ózara is-qımyl jasaý tájirıbesi, AES-tyń elektr energııasynyń baǵasyna áseri, stansııa jumysynyń qaýipsizdigi, jobaǵa jergilikti bıznestiń qatysýy erekshe qyzyqtyrady.
«Bizdiń saparymyz negizinen tájirıbe alý sıpatynda bolyp otyr. AES salý jáne paıdalaný isindegi Sizderdiń tájirıbelerińiz bizdi qyzyqtyrady. Qazaqstandyq AES jobasynyń halyqaralyq bolýy bizdiń qoǵam úshin óte mańyzdy», dedi A. Sátqalıev.
Onyń aıtýynsha, stansııany salýdyń egjeı-tegjeıi týraly túpkilikti sheshimdi Qazaqstan Úkimeti qabyldaýy tıis.
Vengrlik áriptester AES qurý barysynda barynsha ashyq bolý jáne qoǵammen ashyq dıalog qurý óte mańyzdy ekenin atap ótti. Olardyń aıtýynsha, stansııany salmas buryn ony halyqtyń kópshiliginiń qoldaýyna júginý kerek.
Sondaı-aq Qazaqstan delegasııasy Vengrııanyń «EXIM Bank» eksporttyq-kredıttik agenttiginiń basshylyǵymen kelissózder júrgizedi. Ol halyqaralyq saýda jáne ınvestısııalarmen aınalysady, álemniń 150 elimen yntymaqtastyq jasaıdy.