Qasym-Jomart Toqaev Amerıkanyń iri evreı uıymdary prezıdentteri konferensııasy tóraǵasynyń atqarýshy orynbasary Malkolm Honlaındi qabyldady, dep habarlaıdy Egemen.kz Aqordanyń resmı saıtyna silteme jasap.
Kezdesýde Qazaqstan Prezıdenti men Amerıkanyń iri evreı uıymynyń basshysy dinder men mádenıetterdiń jahandyq dıalogyn tereńdetý máselelerin talqylady.
Memleket basshysy forýmǵa belsendi qatysqan meımanǵa alǵys aıtyp, qoǵamnyń dástúrli negizderin saqtaýdyń mańyzdylyǵyn atap ótti. Sondaı-aq bul ıgi is adamdardyń senimi men rýhanı ilimin udaıy nyǵaıtatyn barlyq konfessııaǵa tán ekenine senim bildirdi.
Malkolm Honlaın Álemdik jáne dástúrli dinder kóshbasshylarynyń sezin ótkizýdiń ózektiligi men forýmnyń dinaralyq kelisimdi nyǵaıtýǵa qosqan úlesin atap ótti.