Emır Baıǵazınniń «О́mir» fılmi Qazaqstannyń Oskar komıtetiniń sheshimimen amerıkalyq «Oskar» kınoakademııasynyń syılyǵyna «Shet tilindegi úzdik fılm» nomınasııasynda usynyldy, dep habarlaıdy Egemen.kz
Baıǵazınniń jańa kartınasynyń álemdik premerasy osy kúnderi ótip jatqan bedeldi Toronto kınofestıvaliniń «Zamanaýı álemdik kıno» seksııasynda kórsetildi.
Fılm úsh jyl boıy Almaty, Túrkistan oblysy, Aqtaý jáne Taılandta túsirildi. Kartına taǵdyrlar toǵysyndaǵy túrli oqıǵalar tizbegine tap bolatyn keıipker týraly baıandaıdy.
Basty róldi Erkebulan Tasynov somdaǵan. Baıǵazınniń ózi jobada ssenarıı avtory, rejısser, operator jáne prodıýser boldy.
«Bul fılmniń ıdeıasy maǵan on jyl buryn alǵashqy kartınamdy túsirýge daıyndalyp jatqanda keldi. Keıipkerdiń basyna túsken qıyndyqtarǵa qaramastan, men árqashan bul oqıǵany ómirge degen mahabbatqa toly dep sanaıtynmyn», dedi rejısser.
Fılm Ulttyq kınony qoldaý memlekettik ortalyǵynyń qoldaýymen Qazaqstan Respýblıkasy Mádenıet jáne sport mınıstrliginiń tapsyrysy boıynsha túsirilgen.
Al Emır Baıǵazın 2013 jyly ár túrli festıvalderde 25-ten astam marapattarǵa ıe bolǵan «Ýrokı garmonıı» kartınasymen álemdik kıno alańyna shyqty. Ol Qazaqstanǵa alǵashqy bolyp Berlın kınofestıvaliniń «Kúmis aıýy» júldesin ákelgen. Keıin rejısserdiń «Ranenyı angel» men «О́zen» fılmderi shyqty, batys jurtshylyǵy ony jyly qabyldady. «О́zen» fılminiń álemdik premerasy 75-shi Venesııa kınofestıvalinde «Kókjıekter» baǵdarlamasynda kórsetildi, onda Emır «Úzdik rejısser» retinde marapattaldy.
95-shi ret beriletin Amerıkalyq kınoakademııa syılyǵyna úmitkerlerdiń tizimi 2023 jylǵy 24 qańtarda jarııalanady. Rásimniń ózi 2023 jylǵy 12 naýryzda ótedi.