Qazaqstan Prezıdenti Qasym-Jomart Toqaev Almaty qalasynda BUU-nyń Ortalyq Azııa men Aýǵanstan úshin Ornyqty damý maqsaty jónindegi aımaqtyq ortalyǵyn ashý mańyzdy dep esepteıtinin aıtty, dep habarlaıdy Egemen.kz.
«Ortalyq Azııa týraly aıtar bolsaq, biz onyń qazirdiń ózinde halyqaralyq yntymaqtastyq úshin mol múmkindikteri bar aımaq ekenin este ustaýymyz kerek. Ortalyq Azııadaǵy áriptesterimizben birge aımaqty odan ári damytý maqsatynda ózara saıası is-áreketti nyǵaıtýǵa jáne ekonomıkalyq baılanystardy tereńdetýge nıettimiz. Biz tatý kórshilik qarym-qatynastardy saqtaýǵa jáne yntymaqtastyqty ártaraptandyrýǵa beıildimiz. Biz – Shyǵys pen Batystyń, Ońtústik pen Soltústiktiń arasyndaǵy aralyq naryqpyz. Biz klımattyń ózgerýi, Aral teńizi, sý resýrstaryn utymdy paıdalaný, shekarany delımıtasııalaý, ekstremızmge qarsy kúres jáne aımaqishilik saýdany keńeıtý máselelerin qamtıtyn óńirlik kún tártibindegi máselelerdi sheshý úshin barlyq múddeli taraptarmen birlesken jumystardy jalǵastyrýǵa nıettimiz. Sondyqtan Almaty qalasynda BUU-nyń Ortalyq Azııa men Aýǵanstan úshin Ornyqty damý maqsaty jónindegi aımaqtyq ortalyǵyn ashý mańyzdy dep esepteımiz», dedi Prezıdent.
Qasym-Jomart Toqaev Qazaqstan Aýǵanstannyń bolashaǵyn kórshi eldermen beıbit qarym-qatynasta bolatyn shynaıy táýelsiz, beıtarap, birtutas, damyǵan memleket retinde kórgisi keletenin atap ótti.
«Sondyqtan asa mańyzdy gýmanıtarlyq kómek kórsete otyryp, osy elde memlekettilik qalyptasýynyń kúrdeli prosesin qoldaımyz», dedi Memleket basshysy.