Premer-Mınıstr Álıhan Smaıylov Birikken Arab Ámirlikterine resmı sapary aıasynda «Ál-Bahr» saraıynda BAÁ Prezıdenti sheıh Muhammed ben Zaıd Ál Nahaıanmen kezdesý ótkizdi, dep habarlaıdy Egemen.kz.
Kezdesý barysynda Premer-Mınıstr bıyl eki el arasyndaǵy dıplomatııalyq qatynastardyń ornaǵanyna 30 jyl tolyp otyrǵanyn atap ótti. Onyń aıtýynsha, sol ýaqyt aralyǵynda dıplomatııalyq qatynastar strategııalyq seriktestik deńgeıine kóterildi.
«Biz ózara qyzyǵýshylyq týdyratyn ekonomıkanyń barlyq salalarynda keń aýqymdy yntymaqtastyqty odan ári nyǵaıtýǵa nıettimiz. Sondaı-aq Birikken Arab Ámirlikterine Qazaqstannyń halyqaralyq bastamalaryn árdaıym turaqty túrde qoldap otyrǵany úshin alǵys aıtamyz», dedi Álıhan Smaıylov.
Premer-Mınıstr sońǵy jyldary túrli salalardaǵy birlesken jobalar sanynyń ósýi baıqalyp otyrǵanyn aıtty.
«Investısııalyq yntymaqtastyqty odan ári arttyrý jáne tereńdetý úshin aıtarlyqtaı áleýet bar. Úkimet ınvestorlarǵa olardyń bastamalaryn iske asyrýda jan-jaqty qoldaý kórsetýge ázir. Jaqyn arada biz jańa birlesken jobalardy iske qosamyz dep úmittenemin», dedi Á.Smaıylov.
Sonymen qatar Premer-Mınıstr BAÁ Prezıdentine Qostanaı oblysyndaǵy ormandy qalpyna keltirý jumystaryna $1 mln kóleminde kómek kórsetkeni úshin alǵys bildirdi.
Sheıh Muhammed ben Zaıd Ál Nahaıan Qazaqstan men Birikken Arab Ámirlikterin erekshe dostyq qatynastar baılanystyratynyn atap ótti.
«Men ekijaqty yntymaqtastyqtyń barlyq baǵyttaryn tolyq qoldaımyn», dep BAÁ Prezıdenti Qazaqstan Prezıdenti Qasym-Jomart Toqaevqa ystyq yqylasyn jetkizdi.