Atyraý oblysynda Kaspıı teńiziniń jaǵalaýyndaǵy qamys órtine tikushaqpen 33 márte sý shashyldy. Qamys órti 14 qyrkúıekten beri sónbeı tur, dep habarlaıdy Egemen.kz.
Oblystyq tótenshe jaǵdaılar departamentiniń qoǵammen baılanys tobynan málim etkendeı, bir aptada buryn tutanǵan órt aýmaǵy 60 gektarǵa jetken.
«Búgin, 21 qyrkúıekte jergilikti ýaqytpen saǵat 07:30-da qamys órtin sóndirýge «QazAvıaQutqarý» AQ-nyń MI-8 VSÝ-5 tikushaǵy jiberildi. Sý shashý qurylǵysy bar tikushaq ekıpajynyń quramynda 5 adam bar. Kaspıı teńiziniń jaǵalaýyna áýeden barlaý júrgizý kezinde órttiń eki oshaǵy anyqtaldy. Buǵan qosa 400 sharshy metr aýmaqta qamys órti byqsyp jatqany belgili boldy. Ekıpaj quramy tikushaqpen áýeden órt oshaǵyna 33 márte sý shashty. Sóıtip, 400 sharshy metr aýmaqtaǵy bir órt oshaǵy sóndirildi», dep habarlady departamenttiń qoǵammen baılanys toby.
Teńiz jaǵalaýyndaǵy qamys órti keshe 20 qyrkúıekte údeı tústi. О́rt oshaǵyna jetý úshin jol izdegen TREKOL kóligi batpaqqa batyp, órt oshaǵynda qalyp qoıdy. Kóliktegi eki órt sóndirýshi qaýipsiz jerge jedel evakýasııalandy. Jalyn «Aqjaıyq» memlekettik tabıǵı rezervatynyń aýmaǵyna jaıylǵan.
Búgin, 21 qyrkúıekte qamys órtin sóndirýge Atyraý oblystyq tótenshe jaǵdaılar departamentinen 31 qyzmetker, 10 tehnıka, 1 sý kóligi, «Aqjaıyq» melekettik tabıǵı rezervatynan 20 jumysshy, 5 tehnıka jumyldyrylǵan. Sondaı-aq jergilikti atqarýshy organdardan 3 adam, 3 tehnıka, erikti órt sóndirý jasaǵynan 15 adam, 2 tehnıka tartylǵan.