Jalpy, Jetisý óńiriniń eginshilik salasynda kóshi ilgeri. Bıyldyń ózinde 80 myń gektarǵa jýyq alqapqa júgeri egildi. Sonyń 26 myń gektardan astamy sońǵy 60 jyl aýqymynda júgerini jetekshi daqyl retinde baptap kelgen Jarkent óńiri eginshileriniń enshisinde. Sondyqtan bolar sońǵy jyldary egin jınaý naýqanynyń aldynda oblys júgerishileriniń basym bóligi Jarkent óńirine jınalyp, alqaly keńes quryp júr.
Dástúrli túrde ótetin eginshiler jıyny bıyl da jalǵasyn tapty. Bul joly Jetisý aımaǵy ǵana emes, Qazaqstannyń birqatar oblysynan da júgeri óndirisine qyzyǵatyn azamattar shekara shebindegi aýdanda bas qosty. Jarkent óńirine jınalǵan dańǵaıyr kásipkerler «Pıoner» býdanyn ósirý tehnologııasy» taqyrybynda aımaqtyq semınar-keńes ótkizdi. Negizinen júgeri óndirisimen shuǵyldanatyn Panfılov, Eńbekshiqazaq, Uıǵyr, Ile jáne Eskeldi aýdandarynyń júgerishileri men aýylsharýashylyq mamandary, ǵalymdar bas qosqan alqaly jıyn aýdandaǵy elıtalyq júgeri tuqymyn ósiretin «Ernar» JShQ bazasynda uıymdastyryldy.
Semınarǵa jınalǵan qaýym aldymen Alem Agro, «Djon Dır», BNK Group, Eurasia Group syndy dúnıe júzi men Qazaqstanda belgili, eginshilikke qajetti tehnıkalardy, tyńaıtqyshtardy, basqa da hımıkattardy taratatyn kompanııalardyń kórmege qoıǵan ónimderin tamashalap, «Ernar» JShQ jańa tehnologııamen ósirip, synaqtan ótkizilip, endi jańa tuqym túrinde óndiriske usynylatyn Amerıkanyń «Korteva Agrısaens Qazaqstan» kompanııasynyń «Pıoner» júgeri suryptarynyń alqabymen tanysty.
«Jalpy AQSh-ta «Korteva» kompanııasy 230 jyldan beri basqa daqyldarmen birge júgeri tuqymyn óndirip, álem elderine taratyp keledi. Al kompanııa shyǵarǵan júgeriniń «Pıoner» surybynyń óndiriske engenine 95 jyl boldy. Bizdiń elde bul suryptyń býdan brendi 2006 jyldan beri ósiriledi. Osy joly Jarkentke onyń óndirilip júrgen 6 brendi men 5 jańa býdan tuqymyn dıqandarǵa kórsetýge ákeldik», dedi osy kompanııanyń Qazaqstandaǵy agronomııalyq qoldaý boıynsha mamany Nurlan Qulmuratov.
Júgerishilerdiń alqaly jıyny da alqap basynda uıymdastyryldy. Semınar jumysyn Panfılov aýdanynyń ákimi Marat Saǵymbek júgeriniń otany sanalatyn Panfılov aýdanynda óndiristi barynsha órkendetip, halyqtyń turmys jaǵdaıyn jaqsartýǵa qoldaý kórsetip júrgen, elıtalyq tuqym taratatyn, ozyq tehnologııalar men tehnıkalar, tyńaıtqyshtar, gerbısıdter usynyp otyrǵan kásiporyndardyń ókilderine rızashylyǵyn bildirdi.
Keńeste Agrarlyq nesıe seriktestiginiń Jetisý oblystyq fılıalynyń dırektory Izbasar Júsipbekov eginshilerge 6-7 paıyzdyq jeńildikpen qarjylaı qoldaý kórsetýge qaýqary baryn jetkizdi. Al AQSh-tyń «Korteva Agrısıans Qazaqstan» kompanııasynyń Qazaqstandaǵy ókili Tatıana Kýdrına osy keńeste júgerishilerge tanystyrylatyn «Pıoner» júgeri tuqymdarynyń jersinýi men ónimdiligi jóninde áńgimeledi.
Keńestiń qorytyndy sózi «Ernar» JShQ jetekshisi Tasqyn Japarqulǵa usynylyp, ol qojalyqtyń surypty synaý teliminde synaqtan ótken «júgeriniń» jańa tuqymdaryna sıpattama jasady. Sonymen qatar qojalyq jetekshisi júgeri daqylyn ósirýdiń jańa tehnologııalaryna da keńinen toqtaldy.
Jetisý oblysy