Jetisýdyń jemis-jıdegi men kókónisine qol jetkize almaı júrgen elordalyqtar úshin «Astana Arena» stadıonynyń aýmaǵynda oblystyń taýar óndirýshileriniń aýyl sharýashylyǵy jármeńkesi ótti. Jármeńkeniń alǵashqy kúninen-aq jetisýlyqtar alyp kelgen 227,1 tonna óniminiń 150 tonnasyn satyp úlgerdi.
Almaty men Jetisý óńiri birlesip ótkizgen jármeńkege Jetisý oblysynyń 8 aýdany men 2 qalasy qatysty. Sonymen qatar Kóksý qant zaýyty da óz taýaryn usyndy.
Oblys ákiminiń baspasóz qyzmetiniń habarlaýynsha, astanalyq turǵyndar úshin elordaǵa jalpy somasy 401,4 mln teńge bolatyn 227,1 tonna ónimniń 54 túri aparylǵan. Sonyń ishinde et-sút, shujyq, balyq ónimderi, qant, un, jarma, ósimdik jáne janýar maılary, kókónis, jemis-jıdekter, bal, ulttyq sýsyndar jáne t.b. azyq-túlikter bar. «Saýda qyzý júrdi» deıdi sharýalar. Jalpy, jármeńkege jetisýlyq 35 sharýa qojalyǵy qatysty.
«8 jyldan beri Astanada turamyn. О́zim negizi Taldyqorǵannan kóship kelgenmin. Jetisý oblysy jármeńke ótkizedi dep estigende qýana-qýana keldim, týǵan jerimniń ekologııalyq taza ónimderin satyp aldym. Jyl saıyn jármeńkede sary maı, et, alma men kókónisterdi molynan alyp qaıtamyn», dedi astanalyq Marǵýa Jadyraeva.
Jármeńke alańynda Astana qalasynyń ákimdigimen birlese konserttik baǵdarlama uıymdastyryldy.