Búginde Qazaqstan-Reseı shekarasynda Qazaqstan Respýblıkasyna kirip jatqan shetel azamattarynyń sany artqan, dep habarlaıdy Egemen.kz QR UQK baspasóz qyzmetine silteme jasap.
Ornatylǵan 30 avtomobıldik ótkizý pýnkti shtattyq rejımde jumys isteýde. Adamdar men kólik quraldary aǵynynyń ulǵaıýyna baılanysty, onyń tórteýinde keptelis týyndaǵan.
Elimizdiń UQK ahýal erekshe baqylaýǵa alyndy dep málimdeme jasady.
«Shekara qyzmeti memlekettik quzyretti organdarmen birlesip, shekara arqyly ótý oryndarynda qaýipsizdik pen quqyqtyq tártiptiń saqtalýyn qamtamasyz etýde. Reseı shekara vedomstvosymen ózara birlesken is-qımyl uıymdastyryldy. UQK Shekara qyzmeti óziniń is-áreketinde halyqaralyq sharttardy jáne QR ishki zańnama normalaryn basshylyqqa alady», dep jazylǵan habarlamada.