Álıhan Smaıylov Úkimettiń kóshi-qon máselelerine qatysty ótkizgen jıynyna qatysty túsinik berdi, dep habarlaıdy Egemen.kz.
«Keshe Úkimettiń kóshi-qon máselelerine qatysty ótkizgen jınalystaǵy málimetterge baılanysty qoǵamda durys túsinbeı jatqandar bar. Shetel azamattaryna zań aıasynda qyzmet kórsetiledi. Biz halyqaralyq mindetterimizdi oryndaı otyryp, óz elimiz ben halqymyzdyń múddesinen joǵary qundylyq joq ekenin umytpaýymyz kerek. Eń mańyzdy máseleniń biri – quqyqtyq tártip pen qaýipsizdik», dedi Álıhan Smaıylov Úkimet otyrysynda.
Sondaı-aq ol jaldamaly turǵyn úı baǵalarynyń ósýinen óz azamattarymyzdyń qıyn jaǵdaıǵa tap bolǵanyn sóz etti.
«Jaýapty organdar turǵyn úı naryǵyndaǵy ahýaldy turaqtandyrý boıynsha tıisti sharalardy qabyldaý qajet. Ony biz keshe aıttyq. Eńbekpen qamtý boıynsha eń aldymen qazaqstandyqtardyń jaı-kúıi, jumys jaǵdaıy biz úshin prıorıtet bolýy tıis. Barlyq kásiporyndar men mekemeler osyny esten shyǵarmaý kerek. Al, kórshiles elden kelgen mıgranttar belgilengen zańnama sheńberinde ǵana eńbek ete alady. Jaǵdaı kúndelikti baqylaýda», dedi Úkimet basshysy.