Taldyqorǵan qalasy kúnine oraı ındýstrıaldy aımaqta gaz blok kirpishterin shyǵaratyn zaýyt iske qosyldy, dep habarlaıdy Egemen.kz Jetisý oblysy ákiminiń baspasóz qyzmetine silteme jasap.
Jańa zaýyt táýligine 100 tekshe blok shyǵarady dep kútilýde. Aldaǵy ýaqytta jylyna 1,5 mln. ónim óndiretin qýattylyqqa shyǵý josparlanyp otyr. Munda 30 jumys orny ashylǵan, al jalpy ınvestısııa kólemi - 200 mln teńgeni quraıdy.
«BARS TECHNOLODGIES» zaýytynyń dırektory Irına Hannyń aıtýynsha, bul - kompanııanyń «Taldyqorǵan» ındýstrıaldy aımaǵynda ashyp otyrǵan ekinshi nysany.
«Bizdiń alǵashqy zaýytymyz 2017 jyldan beri tabysty jumys istep keledi, onda saǵatyna 200 tekshe beton shyǵarylady. Kásiporynda 40 adam jumys isteıdi. Gaz blok óndiretin kásiporyn salý daıyndalǵan bıznes-jospardyń jalǵasy bolatyn. Ázirge 30 adamdy jumyspen qamtyp otyrmyz. О́nim shyǵarý kólemin arttyrǵan kezde 80 adamǵa deıin jumysqa tartamyz, ınvestısııay kólemin 800 mln teńgege deıin ulǵaıtamyz degen josparymyz bar», dep atap ótti ol.
Kásiporyn óziniń alǵashqy tapsyrystaryn qabyldap úlgerdi, qazir olarda shyǵarylǵan joǵary sapaly qabyrǵa bloktary oblys ortalyǵyndaǵy kóp qabatty úılerdi salýda qoldanyla bastady.