Esep komıtetinde syrtqy memlekettik qarjy baqylaý organdary úılestirý keńesiniń kezekti otyrysy ótti. Onda memlekettik qarjylyq baqylaýdyń tıimdi júıesin qurý boıynsha júrgiziletin jumystardyń sapaly oryndalýy úshin qabyldanatyn sheshimder talqylandy.
Keńes jumysyna Qarjy mınıstrligi ókilderi, Astana jáne Almaty qalalary tekserý komıssııalarynyń tóraǵalary qatysty. Memlekettik qarjylyq baqylaýdyń halyqaralyq ozyq tájirıbesin qoldaný týraly Elbasy tapsyrmasyna oraı, memlekettik aýdıtti engizýdiń tujyrymdamasy bekitilgen bolatyn. Keńes otyrysyna qatysqan oblystyq komıtet basshylaryna sol tujyrymdamanyń prınsıpteri men tásilderin ári qaraı damytý máseleleri túsindirildi. Syrtqy memlekettik qarjy baqylaý organdary anyqtaıtyn zańnama kemshilikteri men buzýshylyqtaryna monıtorıng júrgizý, baqylaý nysandary boıynsha biryńǵaı aqparattyq derekqordy jetildirý jaıy talqylandy. Jalpy, tekserýdiń qaıtalanýyn azaıtý, tekseris barysynda tek táýekel dárejesi joǵary nysandardy ǵana qarastyrý jaıy sóz boldy. Bul úshin baqylaý nysandary boıynsha burynnan jumys atqaryp kele jatqan biryńǵaı aqparattyq derekqordy jınap, sonyń negizinde memlekettik aýdıt júrgizý engizilmek. Derekqor negizinde saraptama júrgizilip, tekserilýge mindetti táýekel dárejesi joǵary obektiler nysanaǵa alynatyn bolady. Máslıhattarǵa esep beretin, jergilikti bıýdjettiń atqarylýyna syrtqy memlekettik qarjy baqylaýdy júzege asyratyn tekserý komıssııalarynyń problemaly máseleleri de talqylandy. Olardyń baǵdarlamalyq qujattardy iske asyrýǵa bólingen qarajatty jetkiliksiz qamtýy, buzýshylyqtardy anyqtaýdyń tómendigi, bıýdjetke óteý kóleminiń azdyǵy jáne qyzmetti avtomattandyrý deńgeıiniń tómendigi atap ótildi.
Tekserý komıssııalary qyzmetkerleri arasyndaǵy sybaılas jemqorlyqqa qarsy is-áreket máseleleri de erekshe nazarda boldy. «Almaty jáne Ońtústik Qazaqstan tekserý komıssııalary qyzmetkerleri istegen sybaılas jemqorlyq quqyqbuzýshylyq faktileri keń qoǵamdyq talqylaýǵa túrtki boldy», dedi Esep komıtetiniń tóraǵasy Q.Jańbyrshın. Onyń pikirinshe, bul óńirlerdegi syrtqy memlekettik qarjy baqylaý organdarynyń ımıdjine nuqsan keltiredi. Ol tekserý komıssııalary tóraǵalaryna qol astyndaǵy qyzmetkerlerdiń is-áreketi úshin derbes jaýap beretinin, sondaı-aq sybaılas jemqorlyq kórinisteriniń aldyn alýǵa baǵyttalǵan naqty is-sharalar qabyldaý qajettiligin atap ótti.
Venera TÚGELBAI,
«Egemen Qazaqstan».