Bul týraly óziniń Telegram arnasynda QR Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın málimdedi, dep habarlaıdy Egemen.kz.
«Túrkııa prezıdentiniń Qazaqstanǵa memlekettik sapary aıasynda búgin Túrkııanyń Qorǵanys ónerkásibi agenttiginiń basshysy, áriptesim Ismaıl Demır ekeýmiz aeroǵarysh ónerkásibi salasyndaǵy ózara túsinistik týraly Memorandýmǵa qol qoıdyq», dep jazdy mınıstr.
Onyń aıtýynsha, atalǵan memorandým spýtnıktik baılanys pen telehabar taratý salalarynda ǵaryshtyq júıelerdi qurýǵa, jerdi qashyqtyqtan zondtaý, tehnologııalyq jáne ǵylymı maqsattarda uzaq merzimdi yntymaqtastyq ornatýǵa múmkindik beredi.
«Jalpy, Túrkııalyq áriptesimdi ǵarysh salasy boıynsha atqarylyp jatqan jobalarmen tanystyryp, ǵaryshtyq monıtorıng pen jerdi qashyqtyqtan zondtaý baǵytyndaǵy jumystarmen tanystyrdym. Sondaı-aq, arnaıy konstrýktorlyq tehnologııalyq bıýronyń óndiristik alańdaryn jáne «Ǵalam» JShS-degi shaǵyn ǵarysh apparattaryn synaý zerthanasyn araladyq.
Sondaı-aq jerdi qashyqtyqtan zondtaý derekterimen almasý, spýtnıkterdi ázirleý jónindegi ónerkásiptik kásiporyndardyń kooperasııasy, spýtnıktik júıelerdi qurý sııaqty baǵyttardaǵy yntymaqtastyq múmkindikterin talqyladyq», dep jazdy Baǵdat Mýsın.
Budan bólek, mınıstr JQZ jerserikterin birlesip paıdalaný máselesine toqtala ketti.
«Biz bul júıeden bas tartpaımyz jáne ǵaryshta jerserikterdiń bolýy men sanynyń artýyn ary qaraı qadaǵalaıtyn bolamyz, sebebi ol Qazaqstan halqynyń áleýmettik jáne ekonomıkalyq ıgiligin arttyrý jolynda óz yqpalyn tıgizbek. Biraq qazirgi álemde jerseriktik apparattardy jeke dara ıelenýge baılanysty shyǵyndar, birinshi kezekte ekonomıkalyq táýekelderdi týdyrady. Bylaısha aıtqanda, qashyqtyqtan zondtaý jerserigi Qazaqstannyń qajettilikteri úshin ushyrylatyn bolsa, is júzinde biz onyń 10 paıyzyn ǵana paıdalanamyz. Onyń múmkindikterin barynsha paıdalaný úshin barlyq elder deńgeıinde jahandyq satylymdardy qura bilý qajet. Qazirgi ýaqytta álemniń sharing economy baǵytyna bet buryp kele jatqanye eskere otyryp, áriptesimiz ekeýmiz elderimizdegi spýtnıktik júıeler toptamasyn birlesip qurý jáne paıdalaný múmkindigin qarastardyq», delingen mınıstr habarlamasynda.
Kezdesýde túrki elderiniń jerserikter toptamasyn qurý múmkindigi de talqylandy.
«Demır myrzamen biz naqty tehnıkalyq jáne kommersııalyq máselelerdi talqylaý úshin tájirıbe almasýdy damytý qorytyndyǵa keldik. Eki el arasynda kelisimder jasalyp, ony júzege asyrý prosesi bastalsa, basqa túrki elderi de jobaǵa qyzyǵýshylyq tanytatynyna senimdimin», dep jazdy Baǵdat Mýsın.