Qasym-Jomart Toqaev pen Serdar Berdimuhamedov keńeıtilgen quramda kelissóz júrgizdi, dep habarlaıdy Egemen.kz Prezıdenttiń baspasóz qyzmetine silteme jasap.
Memleket basshysy Qasym-Jomart Toqaev Serdar Berdimuhamedovke jáne túrikmen delegasııasyna iltıpat bildirip, elimizdiń qazaq-túrikmen arasyndaǵy ǵasyrlar boıy qalyptasqan dostyq ári tatý kórshilik qarym-qatynastyń nyǵaıýyna zor qurmetpen qaraıtynyn atap ótti.
– Qazaqstan úshin bul mańyzdy oqıǵa dep sanaımyn. Sizdiń saparyńyzdyń tarıhı máni zor. Sebebi biz jabyq formatta yntymaqtastyqty damytýdyń ózekti máselelerin talqyladyq. Kún tártibindegi barlyq máselelerge oń kózqaras tanytqanyńyz úshin alǵys aıtamyn. Men elderimiz arasyndaǵy yntymaqtastyqtyń perspektıvalaryna qatysty Sizdiń barlyq kózqarastaryńyz ben pikirlerińizge oń baǵa berdim, – dedi Prezıdent.
Qasym-Jomart Toqaev Serdar Berdimuhamedovtiń Astanaǵa alǵashqy memlekettik sapary Qazaqstan men Túrikmenstan arasyndaǵy dıplomatııalyq qatynastyń ornaǵanyna 30 jyl tolýymen tuspa-tus kelýiniń sımvoldyq máni bar ekenin atap ótti. Memleket basshysynyń aıtýynsha, eki el ǵasyrlar boıy jalǵasyp kele jatqan dostyqqa, tatý kórshilik baılanysqa, ortaq mádenı jáne tarıhı qundlylyqtarǵa súıene otyryp, qazirgi tańda memleketaralyq seriktestiktiń úlgisine aınalǵan irgesi berik ári úılesimdi qarym-qatynas ornatty.
– Elderimizdiń arasynda belsendi ári joǵary deńgeıdegi ózara senimdi saıası dıalog jolǵa qoıylǵan. Byltyr qazan aıynda bolǵan saparymdy zor yqylaspen eske alamyn. Ashhabadta bolǵanymda barynsha qolaıly jaǵdaı jasap, qonaqjaılylyq kórsetkenińizge rızashylyǵymdy bildiremin. Árıne, munyń barlyǵy sapardyń tabysty ótýine yqpal etti, – dedi Qasym-Jomart Toqaev.
Qazaqstan Prezıdenti Túrikmenstannyń eks-prezıdenti Gýrbangýly Berdimuhamedovke jyly lebizi men izgi tilekterin joldady. Kelissóz barysynda saýda-ekonomıkalyq baılanystar máselesi talqylandy. Taraptar birlesken kúsh-jigerdi arttyra otyryp, ózara saýda-sattyq kólemin 1 mıllıard dollarǵa deıin jetkizýge ýaǵdalasty.
– Mádenı-gýmanıtarlyq baılanystarǵa keletin bolsaq, bul baǵytta bári josparǵa sáıkes damyp keledi. Sondaı-aq men Kaspıı prosesi dep atalatyn yntymaqtastyǵymyz ben ózara is-áreketimizdi atap ótkim keledi. Jaqynda Ashhabadta Kaspıı sammıti ótti. Jıyn oń nátıjege qol jetkizý jáne túrkimen tarapynyń qonaqjaılyq kórsetý turǵysynan da tabysty ótti, – dedi Memleket basshysy.
Serdar Berdimuhamedov Qasym-Jomart Toqaevqa jyly qabyldap, qonaqjaılyq kórsetkeni jáne ortaq jumysqa qolaıly jaǵdaı jasaǵany úshin alǵys aıtty.
– Meniń Qazaqstan Respýblıkasyna alǵashqy memlekettik saparymdy elderimiz arasyndaǵy qarym-qatynastardaǵy eń mańyzdy oqıǵa dep sanaımyz. Onyń negizgi maqsaty – ekijaqty strategııalyq áriptestikti barlyq salada nyǵaıtý. Sonymen qatar qazirgi jaǵdaı men damý úrdisterin eskere otyryp, Ortalyq Azııa aımaǵynda jáne halyqaralyq arenada memleketaralyq yntymaqtastyqtyń naqty baǵdarlaryn aıqyndaý. Túrikmen-Qazaqstan saıası dıalogy, saýda-ekonomıkalyq seriktestiktiń mazmuny men baǵyty keshendi sıpatqa ıe bolyp, kelisilgen strategııaǵa jáne bizdiń is-áreketterimizdiń úılestirilýine jáne eń aldymen, eki halyq pen memlekettiń uzaq merzimdi múddelerine negizdelýi tıis ekenine senimdimin. Búginde elderimiz arasyndaǵy qarym-qatynas qarqyndy damyp keledi, – dedi Serdar Berdimuhamedov.
Keńeıtilgen formatta ótken kelissóz barysynda taraptar ekijaqty kún tártibindegi birqatar ózekti máseleni jan-jaqty talqylap, Qazaqstan men Túrikmenstan arasynda atqarylatyn keleshek is-áreketterdiń negizgi baǵyttaryn aıqyndady.