Búgin Astanada Qazaqstan drama teatrlarynyń respýblıkalyq XXVIII festıvali jumysyn bastady, dep habarlaıdy Egemen.kz.
Bıylǵy jyly saltanatty is-shara teatr men kınonyń kórnekti aktrısasy, KSRO Halyq artısi, Qazaqstan Memlekettik syılyǵynyń laýreaty Sholpan Jandarbekovanyń 100 jyldyǵyna arnalǵan. Sondaı-aq festıval aıasynda Qazaqstannyń Halyq artısi Qadyr Jetpisbaevtyń 80 jyldyǵyna arnalǵan is-sharalar josparlanǵan.
23 qazanǵa deıin jalǵasatyn is-sharaǵa saraptama keńesiniń sheshimi boıynsha irikteýden ótken 10 teatr qatysady. Qoıylymdardy tanymal teatr synshylarynan quralǵan qazylar alqasy baǵalaıdy.
«Bul festıval elimizdiń mádenı ómirindegi eń aýqymdy jáne mańyzdy jobalardyń biri. Ol kórermenderdi shyǵarmashylyq ujymdarmen tanystyryp qana qoımaı, sonymen qatar jas akterlerge, rejısserlerge jáne jazýshylarǵa úlken sahnadan málimdeme jasaýǵa múmkindik beredi. Festıval baǵdarlamasy barynsha aýqymdy, jáne bul bizge eń ózekti másele boıynsha saraptama júrgizýge múmkindik beredi», dedi Mádenıet jáne sport mınıstri Dáýren Abaev resmı ashylý saltanaty aıasynda.
Mınıstrdiń aıtýynsha, Sholpan Jandarbekovanyń shyǵarmashylyq joly - súıikti isine adaldyq pen naǵyz kásibıliktiń jarqyn úlgisi.
Festıvalge S.Qojamqulov atyndaǵy Jezqazǵan qazaq mýzykalyq-drama teatry, Ǵ.Músirepov atyndaǵy Qazaq memlekettik akademııalyq balalar men jasóspirimder teatry, Á.Mámbetov atyndaǵy memlekettik drama jáne komedııa teatry, F.Dostoevskıı atyndaǵy Memlekettik orys drama teatry, Aqmola oblystyq orys drama teatry, Q.Qýanyshbaev atyndaǵy memlekettik akademııalyq qazaq mýzykalyq drama teatry, S.Seıfýllın atyndaǵy Qaraǵandy oblystyq akademııalyq qazaq drama teatry, M.Gorkıı atyndaǵy Memlekettik akademııalyq orys drama teatry, Túrkistan mýzykalyq drama teatry, Respýblıkalyq akademıkalyq nemis drama teatry qatysady.