Prezıdent Qasym-Jomart Toqaev Qazaqstan úshin qazirgi jaǵdaıda turaqtylyq pen tynyshtyq mańyzdy ekenin aıtty, dep habarlaıdy Egemen.kz.
«Qazir álemde óte kúrdeli ahýal qalyptasyp otyrǵanyn bilesizder. Halyqaralyq qatynastar júıesi zor syn-qaterge tap boldy. Birikken Ulttar Uıymynyń basty qaǵıdalary buzyldy. Keıbir elder bir-birine oq atyp, halqynyń berekesin qashyrdy», dedi Prezıdent.
Sondaı-aq Qasym-Jomart Toqaev jurt turaqtylyq pen tynyshtyqtyń qanshalyqty qymbat ekenin túsine bastaǵanyna da toqtaldy.
«Biz aýmaqtyq tutastyǵymyzdyń jáne táýelsizdigimizdiń qadirin bilýge tıispiz. Árbir jan adal eńbek etip, memleketimizdi nyǵaıtýǵa óz úlesin qosýy kerek. Túptep kelgende, táýelsizdiktiń baıandy bolýy ár azamattyń qolynda ekenin umytpaıyq!», dedi Memleket basshysy.