Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyqtary bıýrosy 20 qarashada josparlanǵan elimizdegi mańyzdy saıası naýqan – kezekten tys prezıdent saılaýyn baıqaý boıynsha mıssııasyn bastady.
El bıliginiń arnaıy shaqyrtýymen kelgen halyqaralyq uıymnyń músheleri saılaý kúni ǵana emes, naýqanǵa deıin de, keıin de jumystaryn jalǵastyryp, naqty baǵasyn bermek. Bıýro basshysy Ýrshýla Gasek atalǵan uıym buǵan deıin Eýropadaǵy qaýipsizdik jáne yntymaqtastyq uıymyna múshe elderdegi 400-den astam saıası naýqanǵa qatysqanyn atap ótti.
– Quramda 11 halyqaralyq sarapshy, 30 uzaq merzimdi baıqaýshy bar. Sondaı-aq saılaýǵa birneshe kún qalǵanda qatarǵa qosylatyn 300 qysqa merzimdi baıqaýshy tirkeledi. Basty maqsat – saılaýdyń EQYU mindettemelerine jáne demokratııalyq saılaý ótkizý jónindegi basqa da halyqaralyq mindettemeler men standarttarǵa, sondaı-aq Qazaqstan zańdaryna sáıkes ótýin baqylaý. Qala berdi, ár kandıdattyń quqyǵynyń qorǵalýyn nazarda ustaımyz. Saılaýdan keıin de tıisti jumysty jalǵastyramyz. Sebebi, saıası naýqannan keıin narazylyq týyndaýy múmkin. EQYU-ǵa múshe elderdegi saılaýmen salystyrýǵa quqyǵymyz joq. Keıde bizdi úgit-nasıhat baǵytyndaǵy uıym retinde tanyp, aqyl-keńes beredi dep topshylaıtyndar bar. Biz tek saılaý barysyn, naýqanǵa deıingi jáne keıingi oqıǵalardy baqylaıtynymyzdy aıtqym keledi, – deıdi Ýrshýla Gasek.
Baıqaýshylardyń basym bóligi buǵan deıin elimizde ótken prezıdenttik saılaýlarǵa qatysqan, ıaǵnı tájirıbesi mol mamandar. Olar úgit-nasıhattyń, onyń ishinde áleýmettik jelilerde júrgizilýin, barlyq deńgeıdegi saılaý ákimshiliginiń jumysyn baqylamaq. Saılaýǵa qatysty zańnama jáne onyń oryndalýyn, negizgi bostandyqtardy qurmetteý, saılaý daýlaryn sheshý sııaqty saılaýdyń barlyq aspektilerin muqııat qadaǵalaıdy. Sondaı-aq Demokratııalyq ınstıtýttar jáne adam quqyqtary bıýrosy burynǵy saılaýlarda aıtqan usynymdardyń oryndalýyn baǵalamaq.
Memlekettik organdar men saıası partııalardyń, azamattyq qoǵamnyń, buqaralyq aqparat quraldarynyń jáne halyqaralyq qaýymdastyqtyń ókilderimen kezdesýler baqylaýdyń quramdas bóligi. Atalǵan uıym halyqty jáne buqaralyq aqparat quraldaryn saılaýdy baqylaý mıssııasynyń qyzmeti týraly habardar etý úshin saılaýǵa shamamen eki apta qalǵanda aralyq esep berýdi kózdep otyr.