Prezıdent Q.Toqaev «Ádiletti memleket. Birtutas ult. Berekeli qoǵam» atty Joldaýynda «Bizge sapalyq turǵydan jańa memlekettik basqarýshylar kerek. Memlekettik qyzmetshilerdi irikteý jáne jumystan bosatý júıesin zaman talabyn eskere otyryp, qaıta jasaý qajet», dedi. Budan biz basqarý salasyna, eldiń basqa da sharýasyna elshil, ultjandy tulǵalarǵa zárýlik baryn kóremiz.
Qudaıǵa shúkir, naǵyz memleketshil tulǵanyń tolyq sıpatyn, ozyq úlgisin óz isimen kórsete bilgen arystarymyz, qarymdy qaıratkerlerimiz jeterlik. О́kinishke qaraı, olardyń basym bóligin keshegiler quraıdy. Máselen, Álıhan Bókeıhan, Ahmet Baıtursynuly syndy irilerdiń eline sińirgen eńbekterinen olardyń naǵyz memleketshil tulǵa bolǵanyn anyq kórýge bolady. Búgingiler olardyń qyzmeti men ómir jolynan molynan habardar bolsa, «bolmasa da uqsap baǵýǵa» tyrysar edi.
Jalpy, Alash qaıratkerleriniń elshil tulǵalar bolýynyń negizgi sebebi, durysy syry óz eliniń tarıhyn, júrip ótken jolyn tereń bilýimen qatar, ony yjdahattylyqpen oı eleginen ótkizip, júregimen túsine bilgeninde dep oılaımyz.
Mysaly, arydan oılaı bilgen, keleshektiń kelbetin kókirek kózimen kóre bilgen Álıhan atamyz bolashaqta memleketterdiń qýattylyǵy jeriniń keńdigimen, qazba moldyǵy moldyǵymen ólshenbeıtinin, bilim men ozyq tehnologııaǵa ıek artqandar ǵana damýdyń dańǵyl jolyna túsetinin aıtqany onyń memlekettik múdde bıiginen qarap baryp oı túıetin qaıratker ekenin kórsetse kerek. El múddesin joǵary qoıǵan adam ǵana alysty boljaı alady. Kezinde Á.Bókeıhan: «HH ǵasyr – órkenıet básekelestiginiń zamany. Bul ýaqytta kún astyndaǵy oryn úshin kúrespeıtin hám mádenıetke talpynbaıtyn ulttyń tabylýy kádik... Qazirgi álemdik soǵysta ǵylym ústemdik aldy. Kúndelikti ómirde... ǵylym aıqyndaýshy kúshke aınaldy. Bilimsiz halyq órkenıet qaltarystarynda qalyp qoıatynyn aıtyp jatý artyq... Bizge bilimdi, tájirıbeli saıasatshylar, joǵary bilikti mamandar qajet. Bizge fabrıkalar, zaýyttar, sharýashylyq uıymdary, kooperatıvter jáne basqa da kóp nárseler kerek. Munyń bári bilimdi qazaqtardy qajetsinedi...», dep jazǵan. Osydan 104 jyl buryn aıtylǵan bul qajetter qazir de óte kerek. Budan biz memleketshil tulǵanyń júrgeninen shyqqan sóz halqymen birge jasaı beretinin, aıqyndaýshy baǵdar retindegi qunyn joımaıtynyn ańǵaramyz. Sonymen qatar el múddesi jolyndaǵy Á.Bókeıhan ataǵan mindetterdiń áli de ózekti ekenin kóremiz.
Búgingi memlekettik qyzmetshilerdiń barlyǵy Á.Bókeıhan, A.Baıtursynuly, M.Dýlatuly jáne basqalar deńgeıindegi memleketshil tulǵalar bolýǵa tıis dep talap qoıý artyqtaý bolar, biraq qalaı degende de kim bolsa da Júsip Balasaǵunı aıtqandaı, «О́z paıdańdy oılama – el paıdasyn oıla: óz paıdań sonyń ishinde» dep oılaı bilse, soǵan qaraı amal etýge bekinse, sonyń ózi dátke qýat, úlken tabys.
Memleketshil tulǵa bolý úshin memlekettik qyzmetshi bolý shart emes. Degenmen, memlekettik qyzmetshiler atqarýshy bıliktiń resmı túrde ókili sanalatyndyqtan, bul onyń basqa qarapaıym turǵyndardan artyqshylyǵy bolǵandyqtan, olardyń elshil tulǵa bolý múmkindigi joǵary. Biraq bul múmkindikti kóbisi paıdalanbaıdy nemese ol úshin bas qatyrmaıdy.
Búginde halyq óz arasynan shyqqan naǵyz memleketshil tulǵalardy kórgisi keledi. Al olardyń jarqyrap kórinýine qoǵamda jol ashyq bolýǵa tıis. Olaı bolmaıynsha HHI ǵasyrdyń Álıhandary men Ahmetterin kórý qıyn. Áıtpese, qazaqtyń altyn qursaqty analary el degende júregin julyp berýge daıyn erlerdi qaı kezde de dúnıege ákelgen. Mundaı azamattar búginde de jeterlik, biraq olardyń eline eselep qyzmet etýine, jurtty sońynan ertýine múmkindik bergen jón. Osy oraıda olardy halyqtyń kedergisiz tańdaýyna jaǵdaı jasaý mańyzdy.
Qazirgi tańda elimizde shynaıy saıası básekelestik orta qalyptastyrý baǵytynda oń qadamdar jasalyp jatyr. Alaıda bul baǵyttaǵy is-qımyldardyń shabandyǵy halyqtyń qytyǵyna tıip otyrǵandaı. Jedel ózgerister áleminde ómir súrip jatqandyqtan jurttyń bulaısha degbirsizdik tanytýyna túsinistikpen qaraǵan jón-aq. О́ıtkeni halyq naǵyz memleketshil tulǵalardyń shyqqanyna múddeli jáne bul tileginiń oryndalýy shynaıy saıası básekelestik orta arqyly ǵana múmkin bolatynyna shák keltirmeıdi. Budan biz halyqtyń saıası saýaty deńgeıiniń kóterilgenin, bul óz kezeginde azamattardyń belsendiliginiń arttyrǵanyn kóremiz. Saıası saýattylyq deńgeıi joǵary halyq qashan da ózine ne qajet ekenin biledi ári soǵan qol jetkizýge qumbyl. Bul oraıda basqasyn aıtpaǵanda, halyq memlekettik qyzmetshiler qataryn ult baılyǵyn eseleýge umtylyp júrgendermen tolyqtyrýǵa ózi aralasqysy keledi. Mine, sonda baryp el-jurt popýlısterge aldanbaı, naǵyz janashyr tulǵalardy ekshep, tanyp solarǵa óz tizginin berer edi.