Atyraýda Respýblıka kúnine oraı aqyndar aıtysy ótti. Aıtýly merekege arnalǵan «Egemendigim – eren eldigim» atty sóz saıysyna Shyǵys Qazaqstan, Batys Qazaqstan, Abaı, Pavlodar, Qostanaı, Qyzylorda, Jambyl, Aqtóbe, Atyraý oblystary men Astana qalasynan 16 aqyn qatysty.
– Qazaqtyń ulttyq óneriniń biri – atadan mıras aıtys. Halyqtyń muń-muqtajyn, kóptiń kókeıinde júrgen máselelerdi aýyz ádebıetiniń úlgisimen jetkizetin aqyndardyń respýblıkalyq aıtysy ár óńirde ótip keledi. Biraq bul aıtystyń jóni bólek. О́ıtkeni bıyl 13 jyldan keıin memlekettik mereke retinde qaıta bekitilgen Respýblıka kúnine arnalyp otyr, – dedi oblys ákiminiń orynbasary Jasulan Bısembıev.
О́zindik maqamy men sóz saptaýy bólek aqyndar el egemendigi bekitilgen Respýblıka kúni men táýelsizdikti, bıik beleske jetkizer bekem birlikti arqaý etti. Árıne, munaıly Atyraýdyń ekologııalyq ahýalyn, áleýmettik turmysty jaqsartýǵa yqpaly bar jol máselesin de nazardan tys qaldyrmady.
Qazylardyń sheshimimen respýblıkalyq aıtystyń bas júldesi – 1,5 mln teńge qostanaılyq aqyn Aıbek Qalıev ıelendi. Al 1 mln teńge júldesi bar birinshi oryn jergilikti aıtysker Serikbol Panaberdıevke berildi. Ekinshi orynǵa laıyq dep tanylǵan Nurbeıbit Nuǵymanov (Atyraý oblysy) pen Serik Qýanǵan (Shyǵys Qazaqstan oblysy) 700 myń teńgege ıe boldy.
Úshinshi orynnyń 500 myń teńgelik úsh júldesi Rústem Qaıyrtaıuly (Abaı oblysy), Syrymbek Sársenbaev (Atyraý oblysy) pen Batyrjan Kádirbaıǵa (Atyraý oblysy) buıyrdy. Kórshiles Aqtóbe men Batys Qazaqstan oblysynan qatysqan qos arý – Juldyz Qojabekova men Jansaıa Mýsınanyń óneri 400 myń teńgeniń arnaıy júldesimen atap ótildi.
Sondaı-aq О́nerbek Dáýlekenov (Atyraý oblysy), Aspanbek Shuǵataev (Pavlodar oblysy), Alshynbek Muqanǵalıev (Atyraý oblysy), Nurbolat Nuǵmanov (Atyraý oblysy), Erjan Ámirov (Qyzylorda oblysy), Dıdar Abbas (Jambyl oblysy) pen Oljas Otarǵa (Astana qalasy) yntalandyrý syılyǵy retinde 300 myń teńge tabystaldy.
Atyraý oblysy