Toǵyz jyl burynǵy tabysty qaıtalaı ala ma?

Azııa chempıonatynyń erejesi bo­ıyn­sha, qurlyq básekesi ár eki jylda bir ret ótkizilip turady. Rettilik boıyn­sha Azııa birinshiligi 2023 jyly О́zbekstan­nyń astanasy – Tashkentte uıymdastyrylýy kerek edi. Alaıda bıyl Qytaıda ótedi dep josparlanǵan jazǵy Azııa oıyn­dary belgili sebeptermen kelesi jylǵa shegerilgendikten, Azııa boks konfederasııasynyń basshy­lyǵy jarys kúntizbesine ózgeris engizip, Azııa chempıonatyn bir jyl erte ótkizýge sheshim qabyldady.

Sportty damytý dıreksııasynyń málimeti boıynsha, Qaırat Sətjanov jattyqtyratyn bokstan Qazaqstan ult­tyq quramasy Almaty oblysynyń Báıterek aýylyndaǵy ortalyqta oqý-jattyǵý jıynyn ótkizip, Amman qalasyna attanyp ketti. Ádette, Azııa birinshiligine baratyn boksshylardyń esimi chempıonatqa eki apta qalǵanda belgili bolyp qoıatyn. Bul joly bap­kerler quramy keı salmaqtarda Ior­danııadaǵy dodaǵa kimdi aparatynyn bilmeı, biraz bas qatyrdy.

Máselen, asa jeńil salmaqta 2021 jylǵy álem chempıony, Qazaqstan birinshiliginiń bes dúrkin jeńimpazy Temirtas Júsipov, el chempıony Danıal Sábıt jáne jastar arasyndaǵy álem chempıonatynyń jeńimpazy Sanjar Táshkenbaı arasynan úzdikti tańdaý qıynǵa soqqany anyq. Barlyǵy da saıdyń tasyndaı iriktelgen boksshylar. 63,5 kılo salmaqta da kil myqtylar jınalǵan. Jýyrda ǵana Astanada ótken «Elorda kýbogi» týrnıriniń júl­degerleri – Muhamedsabyr Bazar­baıuly, Sanatəli Tóltaev pen Sultan Mýsın úshtiginen tek bir boksshy ǵana tańdalýy kerek. Al 75 kıloǵa deıingi salmaqta el chempıony Nurqanat Raıysqa təjirıbeli Tursynbaı Qulahmet pen keıingi kezderi táýir nátıje kórsetip, mamandardyń kózine túsip júr­gen Tımýr Nurseıitov pen Dıas Nur­jigitov tegeýrindi qarsy­lyq kórsetti.

Dese de, bapkerler quramy sońǵy sparrıng-jattyǵýda úzdik shyqqan 13 boksshyny tańdap aldy. Atap aıtqanda, Ammandaǵy Azııa birinshiliginde 48 kılo salmaqta Halyqaralyq dərejedegi sport sheberi, jastar arasyndaǵy álem jəne Azııa chempıony, byltyrǵy el birinshiliginiń jeńimpazy Sanjar Tásh­kenbaı óner kórsetetin boldy. 51 kıloda Tokıo Olımpıadasynyń qola júldegeri, álem chempıony Səken Bıbosynovqa senim artyldy. 54 kıloda álem chempıo­natynyń kúmis júldegeri, jastar ara­syndaǵy Azııa chempıonatynyń bir­neshe márte júldegeri Sabyrhan Mahmud ju­dy­ryqtassa, 57 kıloda álem chem­pıo­natynyń kúmis júldegeri, jastar arasyndaǵy Azııa chempıony pavlodarlyq Serik Temirjanov altyn júlde úshin aıqasady.

60 kıloda bapkerlerdiń tańdaýy jastar arasyndaǵy Azııa chempıony, Qazaqstan spartakıadasynyń jeńimpazy Samatəli Tóltaevke tússe, 63,5 kılo sal­maq dárejesinde Samat­əliniń syńary, jastar arasyn­daǵy Azııa chempıony, eresekter dodasynyń qola júldegeri Sanatáli Tóltaev óner kórsetedi. 67 kıloda 2021 jylǵy Qazaqstan chempıony Dýlat Bekbaýov sharshy alańǵa shyqsa, 71 kıloda Jambyl oblysynyń taǵy bir ókili, halyqaralyq dəre­jedegi sport sheberi, Azııa chempıony, Azııa oıyndarynyń kúmis júldegeri, Dúnıejúzilik əskerı oıyndardyń jeńimpazy Aslanbek Shymbergenov Ammanǵa barady.

Byltyr el chempıony atanǵan Nur­qanat Raıys (75 kg) bıyl alǵash ret eresekter arasyndaǵy Azııa chempıonatyna qatyspaq. Sondaı-aq ol 2021 jyly Serbııada ótken álem chempıonatynda óner kórsetip, júldeli oryndarǵa jete almaı qalǵan bolatyn. 80 kıloda el namysyn jastar arasyndaǵy álem jəne Qazaqstan chempıony Nurbek Oralbaı, 86 kıloda jastar arasynda birneshe dúrkin Azııa chempıony, jastar arasynda álem chempıonatynyń kúmis júldegeri Saǵyndyq Toǵanbaı qorǵaıdy.

Aýyr salmaqta (92 kg) jastar ara­­syndaǵy Olımpıada jeńimpazy, Qazaq­stan chempıony Aıbek Oralbaı aıqassa, asa aýyr salmaqta (+92 kg) Tokıo Olım­pıa­dasynyń qola júldegeri, əlem birin­shiliginiń fınalısi Qamshybek Qoń­qabaev judyryqtasady.

«Daıyndyq óte joǵary deńgeıde ótti. Sport jáne dene shynyqtyrý isteri komıteti, Sportty damytý dıreksııasy men Qazaqstan boks federasııasynyń qoldaýymen Ammandaǵy alamanǵa alań­syz daıyndaldyq. Boks elimizde keń taraǵan, únemi jankúıerlerdiń nazarynda bolatyn sport túri. Aldyńǵy qurlyq dodasynyń nátıjesin qoǵamnyń qalaı talqylǵany, synnyń astyna qalǵany əli esimizde. Dýbaıda erler quramasy altynsyz qalǵanyn bilesizder. Bıyl ese qaıtarǵymyz keledi. Maqsat – jalpy esepte kósh bastaý», dedi Sportty damytý dıreksııasyna bergen suhbatynda bas bapker Qaırat Sətjanov.

Boks jankúıerleriniń esinde bolsa, 2013 jyly dál osy Iordanııanyń astanasy – Ammanda ótken erler arasyndaǵy Azııa birinshiliginde Qazaqstan quramasy 7 altyn (Temirtas Júsipov (49 kg), Berik Ábdirahmanov (60 kg), Mereı Aqshalov (64 kg), Danııar Eleýsinov (69 kg), Jánibek Álimhanuly (75 kg), Anton Pınchýk (91 kg) jáne Ivan Dychko (+91 kg)), 1 kúmis (Ádilbek Nııazymbetov (81 kg)) medal oljalap, jalpykomandalyq esepte kósh bastaǵan edi. Osydan toǵyz jyl burynǵy Ammandaǵy sáttilik bıyl da jigitterimizge serik bolǵaı.

Bıylǵy Sary qurlyq birinshiligi 30 qazanda bastalyp, 13 qarashada máresine jetedi. Azııa chem­pıonaty ádettegideı Azııa boks konfederasııasy (ASBC) men Halyqaralyq boks qaýymdastyǵynyń (IBA) erejelerin negizge ala otyryp uıymdastyrylady.