Qazirgi qazaq poezııasynyń shoqtyǵy bıik aqyndarynyń biri, Muqaǵalı Maqataev atyndaǵy syılyqtyń eki márte laýreaty Júrsin Ermannyń tańǵy shyqtaı móldiregen óleńderi oıshyldyǵymen, syrshyldyǵymen birden baýrap, oqyrmandy elitip áketedi. Ony basqa aqyndardan daralap turatyn taǵy bir qasıeti – shynaıylyǵy bolsa kerek. Ol ne aıtsa da «júreginiń túbine kir jasyrmaı» aqtarylyp jazady.
Jalpy, kez kelgen sýretkerdiń bolmysyn onyń shyǵarmasynan jazbaı tanısyz. Bir qaraǵanda, Júrsin aǵamyz – eshkimge keýdesin bastyrmaıtyn ór minezdiń ıesi. Biraq solaı bola tura, aqynnyń otty jyrlarynan janynyń qyldaı názik ekendigin sezinesiz.
Sondaı bir óleńin oqyp kóreıikshi:
Raıy baıaǵydan basqa kúzdiń,
Dámi de aınyǵandaı aq saǵyzdyń.
Shóp tartyp júrýshi edik sonaý belden,
Jabysyp arqasyna qasqa ógizdiń.
Qum saǵyz,
Qara saǵyz,
Aqqan saǵyz,
Zyr qaǵyp júgirýshi ek tapqansha biz.
Qyrlaryn Quljanbaıdyń kezýshi edik,
Kirpikke qarashada qatqansha muz.
Shal qaıda – kúreń atty borbaılaǵan?
El qaıda – syrma aıdaǵan, arba aıdaǵan?
Esińe búgin ǵana bári túsip,
Nesine kúrsinesiń, sorqaınaǵan!
Uıaǵa bolýshy edi torǵaı da alań…
Osy bir demmen quıylyp túsken jyr shýmaqtary adamdy ári-sári oıǵa jeteleıdi. Birese esińizge týǵan aýylyńyz, qaıtyp oralmas balalyq shaq, áldeqashan dúnıeden ozǵan ata-ájeń tússe, endi birde, sol aýyldyń búgingi júdeý beınesin oılap, muńǵa batasyz. Oqyrmandy osyndaı alaı-túleı sezimge bóleıtin parasatty jyrlar – kez kelgen shaıyrdyń qalamynan týmaıdy. Aqynnyń qyshqyl muńymen órilgen óleńderi sizdiń ishki «menińizben» úndesip turady.
Endi «Abaıǵa muń shaǵý» toptamasyndaǵy «Jıyrma teńge» degen óleńine kezek bereıik:
Abaı aǵa, men del-sal bolyp turmyn.
Janaryńda seniń de tolyp tur muń.
Oqýlyqtan kóretin dıdaryńdy,
Endi aqshanyń betinen jolyqtyrdym, – deı kelip:
…Seniń qunyń bolǵanda jıyrma teńge,
Meniń qunym kók tıyn aǵaıynǵa!,
dep túıindeıdi. Aqynda osyndaı tórt aıaǵyn teń basqan shymyr óleńder óte kóp.
Taǵy birde:
Dańqymdy emes, táńirim, antymdy ber,
Boljamasam halimdi – halqym kúler.
Kesheıin qoıdan qońyr tirligimdi –
О́ziniń shamasy men sharqyn biler.
Jaıdaqtalyp ketkenmen zamana tym.
О́ńmendeýmen shyqpasyn jaman atym.
Shuǵa jaýyp jatsa da kókten jerge
Qalǵyp ketpe, qazaqy qaǵanatym!,
dep oqyrmandy jalyndy jyrlarymen jigerin janyp, namysyn qaıraı túsedi.
Ulttyq poezııanyń qaınaryna qanyp ósken aqyn jyrlarynda kóńildi selt etkizer tosyn tirkester, buryn-sońdy aıtylmaǵan obrazdy oralymdar, qazaqy keıipte qona keter beıneli sózder jıi kezdesedi.
Kezinde kórnekti aqyn Sáken Imanasov J.Ermandy «kóbikte bolsa kóp bolsyn», dep bolsyn-bolmasyn, oń jambasyna kelsin-kelmesin, ońdy-soldy qalam siltep, tópelep uryp jaza beretin «aqyndar» sanatynan emes deı kelip: «Áýel bastan-aq «az bolsa da saz bolsyn» degen qaǵıdany qadir tutyp, aıtary bolǵanda ǵana lyqsyp kelgen oıdy irke almaı, shireı tartqan shabytyna shamasy jetpegen tusta ǵana baryp qolyna qalam alatynǵa uqsaıdy. Sodan da onyń ár óleńi qyryq kún babymen baýyryna basyp shyǵarǵan qyran balapandaı shymyr keledi. Kóz aldyndaǵy nurly boıaýdyń óz basy, óz kóńiline laıyqtysyn ǵana tańdap, taýyp ala biledi», dep baǵasyn beripti.
Tujyryp aıtqanda, qazaq poezııasyn úlken bir teńizge teńesek, sonyń bir arnasyn Júrsin Erman oıly da muńly, názik te sezimge baı jyrlarymen toltyryp turǵany anyq.