Kanadanyń Monreal qalasynda uıymdastyrylǵan short-trekten bıylǵy Álem kýboginiń alǵashqy kezeńi máresine jetti. Komandalyq estafetada fınalǵa shyqqan Qazaqstan erler quramasy kúmis júldege qol jetkizdi.
Bes myń metr qashyqtyqqa jarysýda Qazaqstan quramasynyń short-trekshileri bıyl Beıjińde ótken qysqy Olımpııa oıyndarynyń jeńimpazy men júldegerleri – Kanada (Olımpıada chempıony), Koreıa (kúmis) jáne Italııa (qola júldeger) sportshylarymen saıysqa tústi. Úzdiktermen bir deńgeıde óner kórsetken jerlesterimiz máre syzyǵyn ekinshi bolyp qıyp, Álem kýboginiń kúmis júldegeri atandy (7:07.972). Bas júldeni Koreıa quramasy jeńip aldy. Olardyń ýaqyt kórsetkishi – 7:01.850. Qola júde Kanada sportshylaryna buıyrdy. Al Qazaqstan men Kanada sportshylaryna qarsy oıyn erejesin buzǵany úshin Italııa quramasy jarystan shettetildi.
Aıta keteıik, short-trekten alǵashqy Álem kýboginde Qazaqstan quramasy sapynan Abzal Ájǵalıev, Nurtilek Qajyǵalı, Ádil Ǵalıahmetov pen Denıs Nıkısha óner kórsetti. Álem kýboginiń ekinshi kezeńi 4-6 qarasha kúnderi AQSh-tyń Solt-Leık-Sıtı qalasynda ótedi.