Jaqynda elordadaǵy Memlekettik Áskerı-tarıhı mýzeıde Sýretshiler odaǵynyń múshesi, belgili qylqalam sheberi Amanat Nazarquldyń «Elim meniń» atty jeke kórmesi ótti. Mazmundy is-shara Respýblıka kúnimen birge Qazaqstan men Germanııa Federatıvtik Respýblıkasynyń dıplomatııalyq qarym-qatynasynyń 30 jyldyǵyna arnaldy.
Kórmege talantty sýretshiniń keıingi jyldary salǵan 100-den asa týyndysy qoıyldy. Onyń ishinde grafıka, keskindeme janryndaǵy eńbekteri men ózgeshe beınedegi músinderi bar. Qylqalam sheberiniń kez kelgen týyndysy ulttyq boıaýǵa baı. Ásirese kóne dáýir pen búgingi kúndi baılanystyra bederlegen kartınalarynan tarıhymyzdaǵy óz orny bar tulǵalardyń asqaq rýhy men erjúrek beınesin kórip, keýdeńizdi maqtanysh sezimi kerneıdi. Sýretshiniń monýmentaldy janrdaǵy qoltańbasyn da aıryqsha atap ótken jón.
Mádenı is-shara barysynda Áskerı-tarıhı mýzeı dırektory Lázzat Áljan qaıta jańǵyrǵan Respýblıka kúnimen qatar ótip otyrǵan kórmeniń mańyzyn atap ótip, sýretshige jyly lebizin jetkizdi. Odan keıin kórmege Almatydan arnaıy kelgen kórnekti qylqalam sheberi Amandos Aqanaev qazirgi beıneleý ónerinde ónimdi eńbek etip júrgen sýretkerdiń shyǵarmashylyǵyna joǵary baǵa berip, oǵan Qazaqstan kórkem óner akademııasynyń altyn medalin tabys etti. Sondaı-aq ónertanýshy Lıdııa Drozdova kórme ıesiniń eńbekterindegi erekshelikterine toqtalyp, qylqalam sheberine Fransııadaǵy halyqaralyq Mondıal art akademııasynyń sertıfıkatyn tapsyrdy.
«Men Amanat Nazarquldyń shyǵarmashylyǵymen burynnan tanyspyn. Ol I.V.Sýrıkov atyndaǵy Máskeý kórkem sýret ınstıtýtyn bitirgen. Qásibı qylqalam sheberi. Ásirese sýretshiniń «Skıfter – Kentavrlar», «Babalar rýhy», «Úsh grasııa», «Tomırıs», «Túngi jolaýshy», «Qorqyttyń úsh bulaǵy» atty týyndylaryn ulttyq beıneleý óneriniń qazynasyna aınaldy dep aıta alamyn. Búgingi kórmege usynyp otyrǵan jumystary da erekshe, tabıǵılyǵymen baýrap alady», dedi Parlament Senatynyń depýtaty Abdaly Nuralıev.
Kórme sońynda sýretshi Amanat Nazarqul shyǵarmashylyǵy týraly qysqasha sóz qozǵap, kelgen qaýymǵa rızashylyǵyn bildirdi.