Bas qaladaǵy Táýelsizdik saraıynda Memleket basshysy Qasym-Jomart Toqaevtyń qatysýymen barlyq deńgeıdegi máslıhat depýtattarynyń III respýblıkalyq forýmy ótti. Jıynda jergilikti ókildi organdardyń rólin arttyrý, depýtattyq korpýstyń jaýapkershiligin kúsheıtý jáne halyqpen keri baılanysty nyǵaıtý máseleleri talqylandy, dep habarlaıdy Egemen.kz.
Prezıdent óz sózinde máslıhattardyń ókilettigin odan ári keńeıtip, naqtylaý qajettigin atap ótti. Onyń aıtýynsha, jergilikti ókildi organdardyń bılik júıesindegi yqpalyn kúsheıtý – mańyzdy mindet.
«Máslıhattardyń ókilettigin odan ári keńeıtip, naqtylaı túsý qajet. Bul – aıryqsha mańyzy bar mindet. Olardyń jergilikti bılik júıesindegi rólin kúsheıtý kerek», dedi Memleket basshysy.
Toqaev: О́kildi organdardy kúsheıtý memlekettik saıasattyń negizgi basymdyǵy bolyp qala beredi
Prezıdent ákimder halyqpen kezdesken kezde kóterilgen máselelerdi sheshýde depýtattardyń belsendi qatysýy mańyzdy ekenin aıtty.
«Ákimder halyqpen kezdeskende azamattardyń kóbi naqty máselelerdi aıtyp, birneshe suraq qoıady. Sondaı túıtkilder durys sheshimin tabýy úshin depýtattyq korpýs belsendi túrde baqylaý jasap, ákimdermen birge jumys isteýi kerek», dedi Qasym-Jomart Toqaev.
Sonymen qatar Memleket basshysy máslıhattardyń ishki jumys tártibin qaıta qarap, quzyretterin naqtylaý qajettigin jetkizdi.
«Máslıhattardyń ishki jumys tártibin retke keltirip, qaıta qaraǵan abzal. Olardyń kóptegen quzyreti áli kúnge deıin aıqyn emes. Bul ahýal memlekettik basqarý úderisine kedergi keltirip otyr», dedi Prezıdent.
Osyǵan baılanysty óz mindetin oryndamaǵan nemese etıkalyq talaptardy buzǵan depýtattardyń jaýapkershiligin kúsheıtetin naqty sharalar qabyldaý qajettigi aıtyldy. Memleket basshysynyń pikirinshe, mundaı qadam ókildi bılik ınstıtýtyna degen senimdi arttyrýǵa múmkindik beredi.
Prezıdent: Aımaqtar óz bıýdjetin muqııat josparlap, tabysyn arttyrýǵa basa mán berýge tıis
Prezıdent sondaı-aq basqarýdyń rotasııalyq tártibin engizý máselesine toqtaldy. Onyń aıtýynsha, máslıhat tóraǵalarynyń ókilettigi de belgili bir merzimmen shektelýi tıis.
«Biz basqarýdyń rotasııalyq tártibin memlekettik bıliktiń barlyq deńgeıine birtindep engizip jatyrmyz. Qazirgi tańda saılanatyn ákimderdiń ókilettigi eki merzimmen shektelgen. Endi máslıhat tóraǵalaryn rotasııa tártibimen aýystyrý qaǵıdatyn engizý kerek dep sanaımyn. Olardyń ókilettigi de eki merzimnen aspaýy qajet. Osyndaı ádis arqyly kásibı depýtattyq korpýs qalyptastyryp, onyń tıimdiligin arttyrýǵa bolady», dedi Qasym-Jomart Toqaev.
Forým barysynda Memleket basshysy halyqpen tıimdi baılanys ornatýdyń mańyzyn da atap ótti.
«Barlyq deńgeıdegi bılik ókilderi halyqpen ashyq ári túsinikti áńgime, suhbat ornata bilýi kerek», dedi Prezıdent.
Onyń aıtýynsha, azamattardyń shaǵymdarynyń basym bóligin jergilikti deńgeıde sheshýge bolady. Alaıda mundaı máseleler der kezinde qaralmaǵandyqtan, turǵyndar ortalyq organdarǵa jıi júginedi.
«Byltyr Prezıdent Ákimshiligine shamamen 83 myń ótinish kelip túsken. Bul – aldyńǵy jylmen salystyrǵanda 30 paıyzǵa kóp. Shaǵymdardyń basym bóligin jergilikti deńgeıde qarap, der kezinde sheshýge bolatyn edi», dedi Memleket basshysy.
Bıyldan bastap aýyldyq okrýgter qosymsha tabys kózine ıe bolmaq
Prezıdent máslıhat depýtattary halyq pen bılik arasyndaǵy baılanysty qamtamasyz etetin negizgi býyn ekenin atap ótti.
«Máslıhat depýtattary halyq pen bılik arasyndaǵy kópir bolýǵa tıis. Olar turǵyndardyń máselesin sheshýge kómektesýi kerek. Osy mańyzdy jumysqa olardyń quzyreti tolyq jetedi», dedi Qasym-Jomart Toqaev.
Forýmda depýtattyq saýaldardyń tıimdiligine de nazar aýdaryldy. Memleket basshysy ótken jyly oblystyq deńgeıde atqarýshy organdarǵa alty myńǵa jýyq depýtattyq saýal joldanǵanyn aıtyp, olardyń sapasyna erekshe mán berý qajet ekenin jetkizdi.
«Túptep kelgende, aımaqtardyń damýy, turmys sapasynyń jaqsarýy, jurttyń bılikke zor senimmen qaraýy Sizderdiń qyzmetterińizge tikeleı baılanysty. Osyny árdaıym basty nazarda ustaǵan jón», dedi Prezıdent.