Reseımen shekaralas Qıǵash ózeninen bastalyp, eki oblys aýmaǵynan ótetin «Astrahan-Mańǵyshlaq» sý qubyryn jańǵyrtý jumystary bastaldy, dep habarlaıdy Egemen.kz.
Búginde bul sý qubyry Atyraý oblysynyń Qurmanǵazy, Isataı jáne Jylyoı aýdandarynyń, sondaı-aq Mańǵystaý oblysynyń Jańaózen qalasy, Beıneý, Mańǵystaý, Qaraqııa jáne Túpqaraǵan aýdandarynyń tutynýshylaryn sýmen qamtamasyz etýdiń jalǵyz ortalyqtandyrylǵan kózi.
Atyraý oblysy ákimdiginiń baspasóz qyzmeti sý qubyrynyń maksımaldy ónimdiligi – táýligine 110 myń tekshe metr ekenin aıtady.
«Qaıta jańǵyrtý jobasy aıasynda sý qubyrynyń ónimdiligi táýligine 170-200 myń tekshe metrge deıin ulǵaıtylady. Iske asyrý merzimi 2022-2023 jyldarǵa josparlanǵan», dep habarlady ákimdik ókilderi.