AQSh-tyń Las-Vegas qalasynda qazaqtyń áıgili kásipqoı boksshysy Jánibek Álimhanuly orta salmaqtaǵy WBO nusqasy boıynsha álem chempıony ataǵyn qorǵaý úshin Ulybrıtanııanyń ókili Denzel Bentlımen kúsh synasty.
Osyǵan deıin WBO nusqasynyń teńdessizi sanalyp kelgen amerıkalyq Andrade Demetrıýstiń basqa salmaqqa aýysýyna oraı ústimizdegi jyldyń tamyz aıynda altyn belbeý Álimhanulyna resmı túrde tabys etilgenin jankúıerler jaqsy biledi. Iаǵnı, chempıondyq ataqqa ol jekpe-jekke shyqpaı-aq qol jetkizdi. Sol sebepti qandasymyz osyndaı qurmetke ábden laıyq ekenin Las-Vegastaǵy básekede san mıllıon kórermen aldynda taıǵa tańba basqandaı etip dáleldeýge tıis edi.
Atalǵan boks keshinde Jánibek Denzel Bentlımen judyryqtasty. 27 jastaǵy Londonnyń týmasy anaý aıtqandaı azýly emes edi. Onyń kásipqoı boksty serik etkenine bes jyldan asty. Sol ýaqyt aralyǵynda 19 kezdesý ótkizip, 17 ret jeńiske jetti. 14 qarsylasyn nokaýtqa jiberdi. Bir ret utylyp, taǵy bir básekede teń esep tirkeldi. Bentlı buǵan deıingi jekpe-jekteriniń barlyǵyn da óz Otanynda ótkizip, eki dúrkin Ulybrıtanııa chempıony atandy. Al Jánibektiń júrip ótken joly kóz aldymyzda. Ol keremet áýesqoı boks mektebinen ótti. Azııa jáne álem chempıony atanyp, Azııa oıyndarynda altyn tuǵyrǵa kóterildi. Rıo Olımpıadasynyń shırek fınalyna deıin jetti. 2016 jyldan beri kásipqoılar arasynda kúsh synasýda. Sol kezden beri 12 ret rıngke kóterilip, barlyq kezdesýdi óz paıdasyna sheshti. Segiz qarsylasyn esinen tandyrdy. Onyń ústine Álimhanulynyń kásipqoı boks áleminde barynsha bıik belesterdi baǵyndyryp, mol oljaǵa kenelýine ataqty Bob Arým jetekshilik etetin Top Rank promoýterlik kompanııasynyń ózi múddeli. Birden aıta keteıik, ondaı qurmet tegin boksshyǵa kórsetilmeıdi jáne ondaı baq ekiniń birine buıyrmaıdy.
Joǵarydaǵy jaıttardyń barlyǵyn eskere kele, sarapshylar men býkmekerlik keńselerden bastap, qatardaǵy qarapaıym jankúıerlerge deıin Jánibek Álimhanulyn «bul jekpe-jektiń sózsiz favorıti» dep atady. Tipten qaısar qazaq qara násildi jigitti báseke bel ortaǵa jetpeı-aq uryp jyǵatynyna kópshilik esh kúmándanǵan joq. Biraq bári kópshilik oılaǵandaı bolmady. Iá, jekpe-jektiń basynan aǵyna deıin Jánibektiń basymdyǵynmen ótkeni ras. Ol únemi shabýyl ótinde júrip, qarsylasyn qyspaqqa aldy. Soqqylaryn da jıi darytty. Biraq sonyń bireýinen de qarsylasy aıtarlyqtaı zardap shekken joq. Shyny kerek, sol keshte biz shynaıy «qazaq stılin» kóre almadyq. Al qarymta shabýylǵa júgingen Denzel ara-tura ǵana alǵa umtyldy. Qazaqtyń ulynan qaımyqty ma, álde chempıondyq belbeý úshin talasqanynyń ózin qanaǵat tutty ma, áıteýir Ulybrıtanııa boksshysy nartáýekelge barmady. Syrt kózge ol sharshy alańda tek ýaqyt ótkizýmen júrgendeı kórindi.
Aqyry dúıim jurt jeksenbi kúni tań ata turyp, teledıdar arqyly tamashalaǵan jekpe-jek 12 raýndqa deıin sozyldy. Tóreshilerdiń barlyǵy da Jánibektiń jeńgenin biraýyzdan moıyndady. Esep – 116-112, 116-112 jáne 118-110. Osylaısha, qazaq boksshysy ózine tıesili álem chempıony ataǵyn saqtap qaldy.
Bizge bir unaǵany, qandasymyzdyń sońǵy raýndtardaǵy qımyl-qozǵalysy. 11 jáne 12 raýndtarda ol jaqsy soqqylaryn darytyp, Bentlıdi biraz ábigerge saldy. Tipten uryp jyǵýǵa da shaq qaldy. Biraq ózin GGG sekildi álemdik deńgeıde túbegeıli moıyndatý úshin bul tym az. Orta salmaqta kil myqtylardyń shoǵyrlanǵany belgili. Bul jerde Gennadıı Golovkınnen bólek, Erıslandı Lara, Karlos Adames, Haıme Mýngııa, Krıs Iýbenk, Eskıvo Falkao jáne taǵy basqa dúleı kúsh ıeleri bar. Jáne de Álimhanulynyń ózi «Kanelo» degen janama esimmen tanylǵan Meksıkanyń marqasqasy Saýl Alvaresti de jıi-jıi jekpe-jekke shaqyrýda. Al ondaı myqtylardy jeńý úshin Jánibekke áli de jaqsylap turyp eńbektený kerek. Ortań qol ulybrıtanııalyq boksshy Denzel Bentlımen bolǵan básekeden keıin biz osyndaı oıǵa keldik.