Aqtóbede erekshe qajettiligi bar boıjetkender arasynda sulýlyq syny ótti. Oǵan talantty, sulý, bilimdi, qoldarynan óneri tógilgen arbadaǵy jeti arý qatysty. Nátıjesinde, qatań synaqtardan ótip, iriktelgen úmitkerlerdiń arasynan bas báıge Gúlfaıra Ramazanovaǵa buıyrdy.
Kóz tartarlyqtaı ádemi qazaqtyń ulttyq kıimderin kıip shyqqan bıkeshter qazylar aldynda ózderin tanystyryp, qol jetkizgen jetistikteri týraly baıandap, ónerlerin ortaǵa saldy.
Aıta ketý kerek, Aqtóbede arbaǵa tańylǵan bıkeshter arasynda sulýlyq konkýrsy 1999 jyldan beri jyl saıyn ótkizilip keledi. Osy ýaqyt aralyǵynda qıyndyqtarǵa moıynsunbaı, tabıǵı sulýlyǵymen jáne eńbekqorlyǵymen belgili bir salada jetistikke jetken qanshama qyzdar tanyldy. Búgingi kúni olardyń deni ómirden óz oryndaryn tapty. Solardyń biri 1999 jyly ótkizilgen sulýlyq konkýrsynyń júldegeri – Vıktorııa Kvasha. Ol bıylǵy saıysta úzdik shyqqan Gúlfaıra Ramazanovaǵa Mysyrǵa saıahatqa arnalǵan eki adamdyq joldamany tapsyryp turyp, ómir jolyndaǵy ózgerister týraly baıandady.
Sulýlyq saıysyna qatysyp, el aldyna shyqqannan keıin tanymaldyqqa ıe bolǵan Vıktorııa búginde Aqtóbe qalasyndaǵy qazaq tilin tereńdetip úıretetin ortalyqtyń basshysy. Onyń aıtýynsha, erekshe qajettiligi bar jandar óz – ózderin shettetpeı, barynsha ashyq-jarqyn bolyp, adamdarmen rııasyz qarym-qatynas ornata bilse, jetistiktiń kilti osynda. Bul joly sulýlyq saıysyna Gúlfaıramen birge qatysqan alty qyz da syılyqsyz qalǵan joq. Olar osyndaı saıystar erekshe jandardyń boıyndaǵy ashylmaǵan qabiletti tanytyp, qoǵamda óz oryndaryn tabýǵa jol ashady dep esepteıdi.
Aqtóbe oblysy