Tórtkúl dúnıeniń sport jankúıerleri taǵatsyzdana kútken fýtboldan 2022 jylǵy álem chempıonatynyń alaýy jaǵyldy. Jeksenbi kúni Qatardyń Ál-Haýr qalasynda ornalasqan «Ál-Baıt» stadıonynda bıylǵy ala dop alamanynyń resmı ashylý saltanaty ótip, artynsha Qatar men Ekvador quramalary arasyndaǵy matchpen týrnırdiń shymyldyǵy túrildi.
60 myń jankúıerge arnap salynǵan «Ál-Baıt» stadıonyndaǵy ashylý saltanatyna kelgen jankúıerler men telekórermender koreıalyq ánshi jáne BTS tobynyń ókili Chongýk pen qatarlyq ártis Fahad Ál-Kýbaısıdiń «Dreamers» kompozısııasyn, Gollıvýdtyń tanymal ári qurmetti akterleriniń biri, «Oskar» syılyǵynyń laýreaty Morgan Frımenniń sahnalyq ónerin tamashalady. Sondaı-aq uıymdastyrýshylar osyǵan deıingi álem chempıonattarynyń ánurany men boıtumarlaryn kórermenderdiń esine taǵy bir márte salyp ótti.
Al jıynnyń resmı rásiminde Qatar ámiri Tamım bın Hamad At-Tanı sóz sóılep, barsha fýtbol jankúıerin mýndıaldyń bastalýymen quttyqtady. Chempıonattyń ashylý rásimindegi eń erekshe oqıǵanyń biri retinde jergilikti qarı Ǵanım Mýfahtyń Quran súrelerin oqyǵanyn atap ótýge bolady. «Ál-Baıt» stadıonynda Ál-Hýjýrat súresiniń 13-aıaty oqyldy.
Resmı is-sharalar aıaqtalǵan soń jasyl alańǵa jarys qojaıyny Qatar men álem chempıonatynda tórtinshi márte óner kórsetý múmkindigine ıe bolǵan Ekvador quramalary shyqty. Qatar quramasy álem chempıonatyna týrnır uıymdastyrýshysy retinde qatysyp jatsa, Ekvador fýtbolshylary Ońtústik Amerıka qurlyǵynyń irikteý básekesinde Perý, Kolýmbııa, Chılı jáne Paragvaı quramalaryn artqa tastap, Qatar joldamasyn jeńip alǵan edi.
Kópshilik kútkendeı álem chempıonatynyń alǵashqy matchy asa tartysty bola qoıǵan joq. Ekvador fýtbolshylary bul kezdesýde aıqyn basymdyq tanytty. Degenmen, fýtbol jankúıerleri bul matchty basqa qyzyǵýshylyqpen tamashalady dep aıtýǵa bolady. Sebebi chempıonat bastalardan birer kún buryn ınternet áleminde «Qatar bıligi Ekvador quramasynyń segiz fýtbolshysyna úlken somada qarjy usynyp, alǵashqy matchtaǵy jeńisti satyp alypty» degen aqparat áp-sátte búkil álemge taralyp ketti. Áıtse de, bul aqparattyń shyndyqqa esh janaspaıtynyn Ekvador fýtbolshylary matchtyń birinshi taımynda-aq dáleldep tastady. Al osy bir antıjarnamanyń arqasynda atalǵan kezdesý dúnıe júziniń nazaryn ózine aýdartty.
Sóıtip 22-shi álem chempıonatynyń alǵashqy kezdesýinde ekvadorlyqtar alań qojaıyndaryn 2:0 esebimen tize búktirdi. Bıylǵy birinshiliktiń alǵashqy golyn Enner Valensııa 16-mınýtta penaltıden soqty. Sondaı-aq ol chempıonattaǵy ekinshi goldy da óz enshisine jazdy. Osylaısha, álem chempıonattarynyń tarıhynda alǵash ret jarysty uıymdastyrýshy el tusaýkeser matchta jeńiske jete almady.