Fýtboldan álem chempıonaty Qatardyń bes qalasynda ornalasqan segiz stadıonda ótip jatyr. Olar – Lýsaıldaǵy «Ulttyq stadıon» (80 000 kórermenge eseptelgen), Ál-Haýrdaǵy «Ál-Baıt» (60 000), Dohadaǵy «974 stadıony» (40 000) men «Ál-Týmama» (40 000), Er-Raııandaǵy «Halıfa» (45 416) men «Edıýkeıshn sıtı» (45 350) jáne Ál-Vakradaǵy «Ahmed bın Álı» (44 740) men Ál-Djanýb (40 000). Dop dodasynyń ótýine oraı arnaıy salynǵan alǵashqy stadıonnyń irgetasy 2013 jyly qalanyp, tórt jyldan keıin qurylys jumystary tolyqtaı aıaqtaldy. Bul nysandardyń barlyǵy da 2021 jyly paıdalanýǵa berildi.
Bul – Azııa qurlyǵynda ótip jatqan ekinshi álemdik dop dodasy. Alǵash ret 2002 jylǵy jarysty Japonııa men Ońtústik Koreıa qabyldaǵan bolatyn. Mine, sodan keıin araǵa 20 jyl salyp, mýndıal qaıta sary qurlyqta ótýde. Desek te, bul – arab memleketinde jalaýy jelbiregen tuńǵysh baıraqty báseke. Ony uıymdastyrý is-sharalaryna 200 mıllıard AQSh dollarynan asa qarajat jumsaldy. Buǵan deıingi álem chempıonattarynda dál osyndaı mol kólemde qarjy jumsalmaǵan edi.
Álem chempıonaty alǵash ret kúz aılarynyń aıaǵy men qysta ótip jatyr. О́ıtkeni jazda Qatarda aýanyń temperatýrasy 50 gradýsqa deıin kóteriledi. Sol sebepti ondaı aptap ystyqta dop tebý múldem múmkin emes. Al qarasha men jeltoqsan aılarynda termometr tili 20,8-25,4 gradýsty kórsetedi.
Qatarda 32 memlekettiń ulttyq quramalary ózara sheberlik baıqasýda. Olar tórt-tórtten segiz topqa bólindi. Ár toptan úzdik shyqqan eki komanda pleı-offqa joldama alady. Toptyq týrnır 20 qarasha men 2 jeltoqsan aralyǵynda ótedi. 1/8 fınaldyq saıystardy 3-6 jeltoqsan aralyǵynda tamashalaımyz. Shırek fınalǵa shyqqandar 9-10 jeltoqsanda ózara kúsh synasady. Jartylaı fınaldyq básekelerdi 13 jáne 14 jeltoqsanda kóremiz. 17 jeltoqsanda Dohadaǵy «Halıfa» stadıonynda qola júldeger anyqtalady. Al bas júlde úshin tartys 18 jeltoqsanda Lýsıaldaǵy «Ulttyq stadıonda» ótedi.
Bıylǵy álem chempıonatynyń júlde qory 440 mıllıon AQSh dollaryn qurap otyr. Bas júldeni oljalaǵan komanda 42 mıllıon alsa, fınalda utylǵany 30 mıllıondy enshileıdi. Qola júldegerge 27 mıllıon tabys etilse, tórtinshi orynǵa turaqtaǵanǵa 25 mıllıon tıesili bolady. Shırek fınalǵa shyqqandar 17 mıllıonnan alsa, pleı-offtyń alǵashqy kezeńinde súringenderdiń esepshotyna 13 mıllıon aýdarylady. Atalǵan jarysqa qatysqany úshin ǵana komandalarǵa 9 mıllıonnan berilse, daıyndyq jumystaryna taǵy 1,5 mıllıon bólinedi. Sonymen qatar FIFA óz oıynshylaryn mýndıalǵa jibergen klýbtarǵa ótemaqy retinde qosymsha 209 mıllıon tóleýdi qarastyryp otyr. Osy shyǵynnyń barlyǵyn qosa eseptegende, bul soma 1 mıllıard dollardan asady.
Buǵan deıingi álem chempıonattarynda qatysýshylarǵa mynadaı somada qarajat tólengen: 2018 jyl – 791 mıllıon, 2014 – 576 mıllıon, 2010 jyl – 420 mıllıon, 2006 – 282 mıllıon, 2002 – 156 mıllıon jáne 1998 – 103 mıllıon AQSh dollary.
Dúnıejúzilik dop dodasynda Mıýnhenniń «Bavarııasynyń» 17 oıynshysy jasyl alańǵa shyǵady. Tarqatyp aıtsaq, Manýel Noıer, Leon Goreska, Serj Gnabrı, Leroı Zane, Djamal Mýsıala, Iozýa Kımmıh jáne Tomas Mıýller Germanııanyń namysyn qorǵaıdy. Fransııanyń quramynda mıýnhendik klýbtyń tórt fýtbolshysy oınaıdy. Olar – Lýkas Ernandes, Daıo Iýpamekano, Benjamen Pavar jáne Kınglı Koman. Al Erık Shýpo-Motıng Kamerýnnyń, Alfonso Devıs Kanadanyń, Iosıp Stanıshıch Horvatııanyń, Nýssaır Mazraýı Marokkonyń, Matteıs de Lıgt Nıderlandtyń jáne Sadıo Mane Senegaldyń sapynda óner kórsetedi. Sonymen qatar Qatarǵa «Manchester Sıtı» men «Barselonanyń – 16, «Manchester Iýnaıtedtiń» – 14 jáne «Realdyń» 13 oıynshysy keldi.
Bıylǵy álem chempıonatynda óner kórsetetin eń úlken oıynshy – 40 jastaǵy qaqpashy Alfredo Talavera. Ol 1982 jyldyń 18 qyrkúıeginde Meksıkanyń Halısko shtatyndaǵy La-Barka qalasynda dúnıege keldi. «Gvadalahara» akademııasynyń túlegi 2011 jyly óz eliniń ulttyq qurama komandasynyń sapyna qabyldandy. Sol kezden beri 33 ret jasyl alańǵa shyǵyp, 18 dop jiberip aldy. Sondaı-aq «qart» oıynshylardyń qatarynda 39 jastaǵy kanadalyq Atıba Hatchınson (08.02.1983), portýgalııalyq Pepe (26.08.1983), japonııalyq Kavasıma (20.03.1983) jáne brazılııalyq Danı Alves (06.05.1983) syndy sańlaqtar bar.
Qatardaǵy eń jas oıynshylardyń kóshin 20 qarashada 18 jasqa tolǵan Iýssýfa Mýkoko bastap tur. Ol Kamerýnda dúnıege kelgenimen, balalyq shaǵy Germanııada ótti. Jasóspirimder men jastar býyny arasyndaǵy jarystarda jasyndaı jarqyldaǵan shabýylshy bul kúnderi Dortmýndtyń «Borýssııasy» sapynda óner kórsetedi. Bul jigitke býndeslıgadaǵy kóptegen rekord tıesili. Ústimizdegi jyldyń 16 qarashasynda Omanǵa qarsy joldastyq kezdesýde Mýkoka alǵash ret Germanııanyń ulttyq quramasy sapynda alańǵa shyqty. Sondaı-aq eń jas oıynshylardyń tizimine 18 jastaǵy aýstralııalyq Garang Kýol (15.09.2004), ıspanııalyq Gavı (6.08. 2004), kostarıkalyq Djevıson Bennett (15.06.2004) jáne marokkolyq Bilál Ál-Gannýs (10.05.2004) syndy saıypqyrandar enip otyr.