Aqtóbede qutqarýshylar mal izdeýge shyǵyp, qaıta oralmaǵan 52 jastaǵy er adamdy tapty, dep habarlaıdy Egemen.kz TJM baspasóz qyzmetine silteme jasap.
«2022 jylǵy 21 qarasha kúni 18 saǵat 50 mınýtta Baıǵanın aýdany, Kóltaban aýyldyq okrýginde 52 jastaǵy er adamnyń mal izdeýge shyǵyp qaıta oralmaǵany boıynsha aqparat kelip tústi. Oqıǵa ornyna qutqarýshylar birden shyǵyp joǵalǵan azamatty izdeýge kiristi. Nátıjesinde qutqarýshylardyń kúshimen 21 saǵat 00 mınýtta adasqan azamat Sorqudyq podhozynan 3 shaqyrym qashyqtyqtan aman-esen tabyldy. Zardap shekken joq, sol sebepti medısınalyq kómekti qajet etpedi», delingen habarlamada.
Budan basqa qutqarýshylar 1967 jyly týǵan taǵy bir adamdy izdestirip jatyr. Ol 21 qazanda balyq aýlaý kezinde joǵalyp ketken. Izdeý jumystary áli de jalǵasyp jatyr.