Bakýdegi otandastar Naýryz merekesin keń kólemde atap ótti

Merekeni Qazaqstannyń Ázerbaıjandaǵy elshiligi jáne BI Group qurylys holdıngi uıymdastyrǵan. Is-sharanyń ashylý rásimine elshiler men halyqaralyq uıymdardyń basshylary, memlekettik organdardyń ókilderi, qoǵam qaıratkerleri, Baký jurtshylyǵy jáne Ázerbaıjanda turatyn qazaqstandyqtar qatysty. Is-sharany asha otyryp, Qazaqstannyń Ázerbaıjandaǵy elshisi Álim Baıel Naýryzdy Kaspıı teńizi jaǵalaýynda atap ótýdiń baýyrlas eki halyq arasyndaǵy mádenı jáne tarıhı baılanystardyń sımvolyna aınalǵanyn atap ótti. Dıplomat bıyl tuspa-tus kelgen Naýryz ben Oraza aıttyń túrki álemine ortaq qundylyq ekenine nazar aýdardy. Sonymen qatar, mundaı is-sharalar Ázerbaıjan turǵyndaryna Qazaqstannyń dástúrleri men zamanaýı jetistikterimen jaqynyraq tanysýǵa múmkindik beretinin málimdedi.  Times Square-de Naýryz toılandy: Nıý-Iork tórinde qazaqtyń kúıi kúmbirledi

Qonaqtardy sondaı-aq BI Group kompanııasynyń bıznesti damytý jónindegi jetekshisi Ámir Amangeldınov quttyqtap, bul is-sharalardyń Baký qalasynyń barlyq turǵyndary men qonaqtary úshin arnaıy uıymdastyrylǵanyn aıtty.

Ázerbaıjandyqtardyń 20-22 naýryz aralyǵynda Qazaqstannyń etnomádenı murasymen tanysýǵa múmkindigi bar. Merekelik baǵdarlama belgili ártisterdiń, folklorlyq ansamblderdiń, balalar bı ujymdarynyń ónerin, qazaq jáne ázerbaıjan mýzykasynyń úzdik úlgilerin qamtydy.

Erekshe qyzyǵýshylyq týdyrǵan bı nómirleriniń qatarynda «Qara jorǵa» fleshmoby men túrki halyqtaryn biriktiretin «Iаlly» bıi boldy. Konsert «buqaralyq dıskotekaǵa» aınalyp, Baký turǵyndary men Ázerbaıjanda turatyn qazaqstandyqtar qazaq jáne ázerbaıjan áýenderine birge bıledi.

Interaktıvti bólim qazaq jáne ázerbaıjan tilderiniń ortaq tamyrlaryn zerdeleýge arnalǵan tanymdyq baıqaýlardy, sondaı-aq ulttyq «arqan tartý» jáne «asyq atý» oıyndaryn qamtydy.

Merekeni toılaý kezinde oıý-órnek salý jáne ulttyq áshekeıler jasaý sııaqty master-klasstar uıymdastyryldy. Dástúrli taǵamdarmen tanysý da kópshiliktiń erekshe yqylasyna ıe boldy. Qonaqtarǵa merekeniń nyshany sanalatyn taǵamdar – naýryz kóje, baýyrsaq, palaý, jent jáne qurt usynyldy. Elorda teatrynyń Naýryzdaǵy balalarǵa bazarlyǵy Is-shara aıasynda baǵaly syılyqtar oınatyldy. Atap aıtqanda, Air Astana jáne Fly Arystan áýe kompanııalary Baký turǵyndaryna Qazaqstanǵa áýe bıletterin usyndy. Bul eki el arasyndaǵy týrıstik jáne gýmanıtarlyq baılanystardy odan ári damytýǵa degen umtylysty kórsetedi. Teńiz jaǵalaýyndaǵy is-sharalar 22 naýryzǵa deıin jalǵasady jáne uıymdastyrýshylardyń aıtýynsha, ekijaqty mádenı dıalogty nyǵaıtý jolyndaǵy mańyzdy beleske aınalady.