Batys Qazaqstan oblysy Aqjaıyq aýdany Aqjol aýyldyq okrýginde sý jańa munaı jylytý peshi iske qosyldy. Peshti «QazTransOıl» kompanııasynyń tapsyrysy boıynsha Batys Qazaqstan mashına jasaý kompanııasy jasaǵan. Bul – Qazaqstanda jasalǵan alǵashqy munaı jylytý peshi.
Aıta keteıik, qubyr arqyly tasymaldanatyn munaı ónimderi, ásirese, qys kúnderi qoıýlanyp, qatyp qalmaýy, qubyrdan jeńil ótýi úshin jylytylyp otyrady. Mundaı jylytý peshteri ádette ár 100 shaqyrym saıyn ornalastyrylady. Keıingi kezde mundaı peshke suranys artty, sebebi sońǵy halyqaralyq oqıǵalarǵa baılanysty sheteldik zaýyttar jabylyp qalǵan. Al elimizde, tipti TMD aýmaǵynda mundaı kúrdeli qondyrǵyny jasaıtyn óndiris orny joq.
Sóıtip, Oral qalasynda ornalasqan «Batys Qazaqstan mashına jasaý kompanııasy» AQ qyzmetkerleri jańa jobaǵa kirisip ketti. Peshti jobalaý, daıyndaý, montajdaý jáne iske qosý sekildi kúrdeli tizbekti tolyq ózderi atqaryp shyqty. KSRO kezinde «Metallıst» atymen tanymal qarý-jaraq zaýyty sońǵy jyldary baǵytyn keńeıtip, naryqta suranysy bar birneshe jobany qolǵa alǵan bolatyn. Al myna PPN-10 munaı jylytý peshi – Batys Qazaqstan mashına jasaý kompanııasyn jańa qyrynan kórsetti deýge bolady.
– Bizdiń peshimiz barlyq synaqtan sátti ótip, qoldanysqa engizýge qaýipsiz dep tanyldy. Bul búkil TMD aýmaǵynda teńdesi joq iri joba. Biz «QazTransOıl» kompanııasynyń tapsyrysyn alǵan soń, barlyq múmkindikti, resýrsty jumyldyryp, osy qurylǵyny jasaýǵa táýekel ettik. Eńbegimizdiń nátıjesi kútkendegiden de asyp ketti. О́ndiristik qýaty joǵary, órt qaýipsizdigi kúsheıtilgen munaı qyzdyratyn avtomattandyrylǵan PPN-10 peshi qashyqtan basqarylady. Sonymen qatar órtti azottyń kómegimen sóndiretin avtomattyq stansamen jasaqtalǵan. Bul peshtiń paıdaly áreket koeffısıenti 85 paıyzǵa deıin kóbeıtilgen. Saǵatyna 825 tekshemetr munaı ótkizýge qaýqarly, – deıdi «BQMK» AQ bas dırektory Azamat Bıtýrın.
Jańa peshtiń ashylý saltanatyna Batys Qazaqstan oblysynyń ákimi Ǵalı Esqalıev, «QazTransOıl» AQ bas dırektorynyń orynbasary Sábıt Arynov jáne «BQMK» AQ bas dırektory Azamat Bıtýrın bastaǵan kompanııa qyzmetkerleri qatysty.
Ǵalı Esqalıevtiń pikirine qaraǵanda, zaýyttyń jańa ónimi tek oblystyń emes, búkil elimizdiń mashına jasaý salasyn damytýǵa qosqan zor úles.
– Búginde Batys Qazaqstan mashına jasaý kompanııasy elimizdiń munaı-gaz sektory salasyna qajetti joǵary tehnologııalyq jabdyqtardy ázirleıtin jáne óndiretin jetekshi kásiporynǵa aınaldy. Mundaı ınnovasııalyq jabdyqty óndirý bizdiń óńirde joǵary bilikti tehnıkalyq kadrlardyń jetkilikti ekenin kórsetedi. «BQMK» burynǵy «Metallıst» qarý-jaraq zaýytynyń mártebesin saqtaı otyryp, óndiristik qýatyn arttyrý arqyly azamattyq ónimderdiń jańa túrlerin ıgere aldy. «QazTransOıl» AQ-nyń bizdiń kompanııamyzǵa degen senimi úshin alǵys bildiremin. Mundaı nátıjeli yntymaqtastyqtyń bolashaǵyna zor senim bildire otyryp, aldaǵy ýaqytta tapsyrystardyń odan ári arta túsýine tilektespin, – dedi oblys ákimi.
Oraldyq konstrýktorlardyń biregeı ádisteri qoldanylyp jasalǵan PPN-10 munaı jylytý peshinde qazaqstandyq qamtý úlesi shamamen 80%-dy quraıdy. Bul Oral zaýytyna jergilikti naryqtaǵy sheteldik analogtarmen básekelesýge múmkindik beredi deıdi mamandar.
Batys Qazaqstan oblysy