Halyqaralyq baıqaýshylar jýyrda ótken kezekten tys prezıdent saılaýynda daýys berýge kelgen jastardyń qarasy kóp bolǵanyn aıtady. Jas býyn óz eliniń prezıdentin tańdaýǵa úles qosyp qana qoımaı saılaýaldy úgit-nasıhat jumystarynyń bel ortasynda da júrdi. «Bir tolqynda» dıalog alańyna jastar saıası naýqannyń ótý barysyn talqylap, ondaǵy jas belsendilerdiń róli týraly aıtty.
Dıalog alańynyń otyrysynda jastar uıymdarynyń kóshbasshylary, qoǵam qaıratkerleri jáne Halyqtyq koalısııaǵa kirgen sportshylar qaýymdastyǵynyń ókilderi prezıdent saılaýynyń qorytyndysy jóninde óz pikirlerin bildirdi. Sonymen qatar saılaýaldy shtabta BAQ ókilderine arnalǵan baspasóz týry uıymdastyryldy. Olar úgit-nasıhat jáne taldaý ortalyqtary, kandıdattyń qoǵamdyq qabyldaý bólmesi, medıa-shtab, senimdi ókilderdiń jumysyn úılestirý ortalyǵy, baıqaýshylar shtaby men jastar sektorynyń qyzmetimen jaqynyraq tanysty.
Jastar, ásirese Halyqtyq koalısııa atynan saılaýǵa túsken Qasym-Jomart Toqaevtyń úgit-nasıhat naýqany kezinde elimizdiń 42 qalasy men 500 aýyl aımaqty aralaýǵa belsendi qatysqan. Saıası naýqandy ótkizýge 30 myń adam arnaıy daıarlyqtan ótken. «Amanat» partııasynyń «Jastar Rýhy» Jastar qanatynyń tóraǵasy Nurjan Jetpisbaevtyń aıtýynsha, partııa janynan ashylǵan respýblıkalyq qoǵamdyq shtabtyń qyzmeti qajetti qural-jabdyqtarmen qamtylyp, 3 saıası partııanyń, 22 qoǵamdyq uıymnyń ókilderi kedergisiz jumys istegen.
«Biz qala, aýyldardy aralap, Memleket basshysynyń saıası reformalaryn, eldi damytýdaǵy baǵyttaryn, alǵa qoıǵan maqsattaryn túsindirgen kezde jastardyń prezıdentimizge senim artyp, qoldaıtyndaryn kórdik. Bul qoldaý men senim árbir aımaqta sezildi. Shtabtyń jumysyna keler bolsam, kúnine júzdegen is-shara uıymdastyrylyp, úgit-nasıhattyq aqparat keńistigi úzdiksiz tolyǵyp otyrdy. Osy aralyqta 24 myńnan astam is-shara uıymdastyrylǵan eken. Respýblıkalyq shtabtyń úgit-nasıhat toby shalǵaı aýyldardy nazardan tys qaldyrǵan joq. Bul bıylǵy saılaýdyń ereksheligi dep aıtýymyzǵa bolady. Eger buǵan deıingi naýqandarda úgit-nasıhat oblys ortalyqtarynda ǵana ótse, biz osy rette aýyldardy araladyq. О́ıtkeni aýyl – el besigi, ondaǵy halyq qalys qalmaý qajet. Osylaısha, biz kandıdatymyzdyń saılaýaldy baǵdarlamasyn 3 mıllıon adamǵa túsindirgen ekenbiz. Al naýqan bastalarda Prezıdent Qasym-Jomart Toqaev óziniń baǵdarlamasyn bizge tanystyrdy», dedi «Jastar Rýhy» Jastar qanatynyń tóraǵasy.
Aqparattyq jumysqa tartylǵan jastarmen qosa, volonterler úgit-nasıhat quraldaryn taratýǵa úlesterin qosqan. «7,5 myńnan astam belsendi 3 mln-nan astam úgit-nasıhat materıalyn taratty. Olar tek únparaq taratyp qana qoımaı, «Esikten esikke» aksııasyna, saılaýshylarmen ótken ekspromt-kezdesýlerge, azamattardyń usynystary men tilekterin qabyldaý isine atsalysty», dedi Nurjan Jetpisbaev.
Al «Ulttyq volonterler jelisi» ZTB tóraǵasy, depýtat Vera Kım Prezıdenttiń eriktilerdi erekshe qoldaıtynyn atap ótti.
«Prezıdentimizdiń ómirbaıanyn qarasaq, halyqaralyq uıymdardaǵy qyzmetimen qatar Qasym-Jomart Toqaev volonterlik qyzmetti alǵa shyǵarýǵa, ony damytýǵa zor úles qosqanyn kóremiz. Memleket basshysy tarapynan eriktiler qashanda qoldaýǵa ıe bolyp keledi. Sondyqtan volonterlik uıymdar, jastar qozǵalystary óz kezeginde Prezıdentimizdiń saıasatyn qoldaıdy. 2019 jyly Qazaqstan-Reseı forýmynda men barlyq volonterlik qozǵalys atynan 2020 jyldy eriktiler jyly dep jarııalaý týraly usynys aıtqan edim.
О́ıtkeni álemdik pandemııa kezinde eriktiler kúni-túni óz densaýlyqtaryna tónetin qaýipke qaramastan halyqqa kóp kómektesti. Dári-dármek, azyq-túlik tasydy, ózge de qoǵamdyq jumystarǵa belsene aralasty. Osy kezde el volonterlerdi tanı bastady, bul qyzmettiń mánisin túsindi. Árıne, olar sol kezde aıanbaı eńbek etken dáriger, polısııa qyzmetkerlerimen birge memlekettik nagradalarǵa ıe boldy, 2020 jyl eriktiler jyly boldy. Eńbekteri elendi. Bul el basshysynyń erikti jastarǵa degen qurmeti dep bilemiz.
Kandıdattyń saılaýaldy baǵdarlamasynyń negizgi maqsaty – halyqtyń ómir sapasyn jaqsartý. Ádilettilik qaǵıdatyna sáıkes, mártebesine, jynysyna nemese jasyna qaramastan, qazaqstandyqtar teń múmkindikter men quqyqtarǵa ıe bolýǵa tıis. Saılaý qorytyndysy halyq Prezıdentti qoldaıtynyn kórsetti. Elimizdiń, sonymen qatar halyqaralyq baıqaýshylardyń oń pikiri saılaýdyń ashyq ári adal ótkenin aıqyndaıdy», dedi Vera Kım.
Úgit-nasıhat jumystaryna sportshylar da zor úles qosqan. Qoǵam qaıratkeri, 2012 jylǵy London Olımpıadasynyń chempıony, QR Ulttyq Olımpıadalyq komıteti Bas hatshysynyń orynbasary Serik Sápıev «Qazaqstandyq sportshylar odaǵy» respýblıkalyq qoǵamdyq birlestigi eshqandaı partııa quramyna enbegenin, biraq halyqtyq koalısııany jaqtaıtynyn atap ótti. Onyń aıtýynsha, Memleket basshysy buqaralyq jáne kásibı sportty damytýǵa júıeli túrde qoldaý kórsetip keledi.
«Biz Qýatty ári Ádiletti Qazaqstan úshin daýys berdik. Saılaý ýchaskesine kelgen árbir adam óziniń azamattyq paryzyn ótep qana qoımaı, el bolashaǵy úshin tańdaý jasady dep oılaımyn. Biz el ıgiligine qyzmet etýge barymyzdy salamyz jáne barsha qatysýshylardy osyǵan shaqyramyn», dedi Serik Sápıev.
Prezıdenttik jastar kadrlyq rezerviniń múshesi Ábýtálip Mútáli aldaǵy 7 jylda jastar memleket qurý isine eleýli úles qosady dep otyr. «Amanat» partııasy Qoǵamdyq saıasat ınstıtýty dırektorynyń orynbasary Dınara Sádýaqasova saılaýshylardyń usynysy men tilegine nazar aýdardy. «Úgit-nasıhat naýqany barysynda 40 myńnan astam osyndaı usynys-tilek kelip tústi. Bul azamattardyń saıası prosesterge degen qyzyǵýshylyǵy artqanyn ańǵartady», dedi ol.
Saılaýaldy naýqan kezinde aqparattyq súıemeldeýge basty nazar aýdarylǵan. Ásirese ınternet resýrstar arqyly taratylǵan aqparattardyń qaralymy óte joǵary bolǵanyn atap ótti shtab músheleri. Máselen, Toqaev2022 ataýymen iske qosylǵan ınternet arnalary kúnine myńnan astam qaralym jınaǵan. Dástúrli buqaralyq aqparat quraldarynda da kandıdattardyń saılaýaldy baǵdarlamalary tıisti deńgeıde jarııalanyp, kórsetilgen.
Halyqtyq koalısııanyń úgit-nasıhat shtabynyń músheleri ýnıversıtetter men kolledjderdiń stýdentteri, elordalyq jastar máslıhatynyń depýtattary, Jastar qanatynyń belsendileri aldynda úgit-nasıhat jumystary boıynsha osyndaı qorytyndy jasady.