Qatty aıazǵa qaramastan, elordalyq eriktiler jaýrap qalǵan astanalyqtarǵa tegin ystyq shaı berip júr. Mundaı aksııalar jyl saıyn qatty sýyq aýa raıy bastalǵan kezde ótkiziledi, dep habarlaıdy Egemen.kz Astana ákimdiginiń resmı saıtyna silteme jasap.
«Astana jastary» jastar resýrstyq ortalyǵynyń eriktileri «Shapaǵat» saýda úıiniń janyna jınalyp, qala kóshelerin tazalap jatqan jumysshylarǵa, qoǵamdyq kólikti kútip turǵan jolaýshylarǵa jáne kóshede saýda jasap júrgen jolaýshylarǵa shaı berdi.
«Men eriktilerimizge alǵys aıtqym keledi. Kóshede qatty aıaz bar, olardyń isteri tánimizdi ǵana emes, janymyzdy da jylytady. Jastardyń bul isi meni qatty qýantty, rahmet! », dedi elorda turǵyny Saıran Týrbekova.
Aıta ketý kerek, bul aksııa qystyń sońyna deıin jalǵasady.
«Bizdiń qalamyzdaǵy eń sýyq kúnderde jyl saıyn ótkiziletin dástúrli aksııamyz bastaldy. Aksııa barysynda eriktiler qalamyzdyń barlyq turǵyndaryna negizinen halqy eń kóp jerlerde jáne kóshede jumys isteıtinderge aıaldamalarda tegin ystyq shaı taratady», dedi «Astana Jastary» JRO basshysy Shyńǵys Tileýlın.