Elordanyń «Barysy» Qurlyqtyq hokkeı lıgasyndaǵy (QHL) kezekti týr oıynyn syrt aıdynda «Avtomobılıspen» ótkizip, taǵy da jeńilip qaldy.
Sońǵy kezderi ala-qula óner kórsetip júrgen «Barys» Ekaterınbýrgte turaqty birinshiliktegi «Shyǵys» konferensııasynyń kóshbasshysyna laıyqty qarsylyq kórsetti. Degenmen keıingi bes oıynnyń bárinde jeńiske jetken aıdyn ıeleri bul joly da bilgeninen jańylmaı, «Barystan» overtaımda basym tústi. Bir aıta keterligi,«Avtomobılıst» osymen sońǵy bes matchtyń tórteýinde qosymsha mınýtta úzdik shyǵyp otyr.
Ekaterınbýrgtegi «Ýrales» sport kesheninde ótken kezdesýdiń alǵashqy kezeńin jerlesterimiz sátti bastady. Matchtyń nebári 55-sekýndynda Nıkıta Mıhaılıs oıynnyń esebin ashsa, arada tórt mınýt ótkende Egor Petýhov «Barystyń» tablodaǵy basymdyǵyn arttyrdy. 12-mınýtta Nık Ebert mergendik tanytyp, esep aıyrmasyn qysqartqanymen, Entonı Lýıs jyldam qarymta gol soǵyp, esepti 3:1-ge jetkizdi. Ekinshi jáne úshinshi kezeńderde «Barys» oıynshylary qarqynyn joǵaltyp aldy. Osynyń saldarynan aıdyn ıelerinen Vıktor Neýchev (28-mınýt) pen Pavel Kýlıkov (53) dáldik tanytyp, tarazy basyn teńestirip ketti. Al overtaımda Nık Ebert «Avtomobılıske» jeńis syılady – 4:3. «Barys» kelesi oıynyn búgin Chelıabide «Traktormen» ótkizedi.