Jańa oqý jylynan bastap elimizdiń kolledjderine akademııalyq erkindik berildi. Bul týraly Oqý-aǵartý mınıstri Ashat Aımaǵambetov óziniń Telegram arnasynda habarlady, dep jazady Egemen.kz.
Mınıstrdiń aıtýynsha, buryn oqý josparlary men baǵdarlamalaryn jasaý kezinde kolledjder jalpy úlgilik oqý josparlary men baǵdarlamalaryna baılanysty bolatyn. Endi olardyń mazmunyn 50%-ǵa deıin ózgertýge ruqsat etildi. Sondaı-aq oqý josparynyń bólikteri oqý merzimine baılanysty bolatyn. Al jumys berýshilermen ózara is-qımyl kóbine resmı bolyp, kásibı tájirıbelerdi júrgizý jáne olardyń memlekettik attestasııa komıssııalarynyń quramynda bolýy qajet boldy.
«Oqýyn aıaqtaǵan túlekterdi jumysqa qabyldaǵan jumys berýshilerdiń kolledjdermen birlesip jumysqa qabyldaý kezinde olardyń suranystaryna sáıkes keletin bilim berý baǵdarlamalary men praktıkalyq sabaqtardy ázirleýge tolyq múmkindigi bolmady. Endi kolledjderge berilgen akademııalyq erkindik bul jaǵdaıdy túbegeıli ózgertedi. Al stýdentterdiń alǵan bilimderi tájirıbe júzinde qoldanyla bastaıdy», dep jazdy vedomstvo basshysy.
Mınıstr naqtylaǵandaı, jańa erejeler boıynsha jumys berýshiler bilim berý baǵdarlamalaryn ázirleýge jáne saraptaýǵa tikeleı qatysady. Iаǵnı kolledjder oqý josparlary men baǵdarlamalaryn jalpy bekitilgen standart boıynsha emes, eńbek naryǵynyń, kásiptik standarttyń, óńirlik erekshelikterdiń jáne t.b. suranystaryna qaraı ázirleı alady.«Ekinshiden, kolledjderge oqý merzimin anyqtaý quqyǵy berildi. Eger buryn oqý merzimi eki jyldan tórt jylǵa deıin ózgerip, naqty bekitilse, endi ol mamandyqtyń ereksheligine jáne oqý nátıjelerine baılanysty bolady. Nátıjesinde biz kolledjderde stýdentke baǵyttalǵan ortalyq qaǵıdasyn qamtamasyz etemiz. Sondaı-aq stýdentterdiń mamandyqty tańdaý múmkindigi keńeıip keledi. Biz steıkholderlerdiń (múddeli tarap) ózderin tarta otyryp, bilim berý baǵdarlamalaryn ázirleý olardyń kolledjderdegi bilim sapasyna kózqarasyn jaqsarta túsedi dep esepteımiz», dep jazdy Ashat Aımaǵambetov.
Bul rette, mınıstr kolledjderdiń bilim berý baǵdarlamalaryn jumys berýshilermen birlesip ázirleý algorıtmi qandaı bolatynyn túsindirdi.
«Ol mamandyqtar boıynsha qajetti quzyretterdi anyqtaýdy, kásiptik standarttardyń talaptaryna jáne jumys berýshilerdiń úmitine sáıkes keletin oqytý nátıjelerin anyqtaýdy, quzyretterdiń ózara baılanysyn, baǵalaý ádisteri men ólshemderin anyqtaýdy, bilim alýshylardyń qajettilikterin zertteýdi, bilim berý baǵdarlamasyn tolyqqandy iske asyrý úshin resýrstardy aıqyndaýdy qamtıdy. Ázirlengen bilim berý baǵdarlamalary saraptamadan ótip, odan keıin barlyǵyna qoljetimdi bilim berý baǵdarlamalarynyń elektrondy tizilimine engiziledi», dep túıindedi Oqý-aǵartý mınıstri.