Fýtboldan Qatarda ótip jatqan álem chempıonatynyń kezekti kúninde jankúıerler toptyq kezeńniń taǵy tórt matchyn tamashalady. Sársenbi kúni D tobyndaǵy Týnıs – Fransııa, Aýstralııa – Danııa quramalary jasyl alańda kezdesse, C tobynyń tórttigi – Polsha – Argentına, Saýd Arabııasy – Meksıka pleı-offtyń joldamasyn sarapqa saldy.
Bul kúni D tobynyń matchtaryna qaraǵanda, C kvartetiniń kezdesýleri asa tartysty ótip, jankúıerler nazaryn ózine aýdartty. О́ıtkeni bul toptaǵy barlyq quramada kelesi kezeńge shyǵý múmkindigi boldy. Máselen, 1/8 kezeńine joldama alý úshin Argentına men Polshaǵa teń nátıje de jetkilikti edi, al Meksıka men Saýd Arabııasyn tek iri eseptegi jeńis qana qanaǵattandyratyn. Degenmen Argentına Polshany 2:0 esebimen tize búktirse de, eýropalyqtardy ózimen birge kelesi kezeńge alyp shyqty. Al qatarlas ótken ekinshi kezdesýde Meksıka Saýdııany 2:1 esebimen utqanymen, «Astekter» eli úsh týrda da óz qaqpasyna kóp gol ótkizip alǵandyqtan, toptyq kezeńde qalyp qoıdy.
Polsha quramasyn álem chempıonatynyń pleı-off satysyna argentınalyqtardyń aıaýshylyǵy men qaqpashy Voıseh Shensnyıdyń erligi alyp shyqty dese de bolady. Sebebi Argentına bul kezdesýde Polsha qaqpasyna 13 márte dál soqqy baǵyttap, sonyń ekeýin ǵana golǵa aınaldyra aldy. Al Voıseh 11 márte seıv jasady. Tipti ol birinshi taımda Lıonel Messı tepken 11 metrlik aıyp dobyn qaıtaryp, kezdesýdiń sońynda matchtyń qaharmanyna aınaldy. Eger Messı penaltıden gol soǵyp ketkende, Polsha fýtbolshylary chempıonatpen qoshtasýy da múmkin edi. Sonymen qatar Messı bul sátsizdiginen keıin álem chempıonattarynda gol soǵý boıynsha Maradona, Krıshtıaný Ronaldý, Rıvaldo, Rýdı Feller, Ademıra jáne Oskar Mıgesterdiń aldyna shyǵyp alý múmkindigin paıdalana almady. Qazir bul fýtbolshylardyń bári birinshilikte 8 goldan soqqan.
Bul matchta «Iýventýs qaqpashysy 1974 jylǵy álem chempıonatyndaǵy otandasy Iаn Tomashevskıdiń jáne 2002 jylǵy álemdik dodada óner kórsetken amerıkalyq Bred Frıdeldiń jetistigin qaıtalady. Iаǵnı úsh qaqpashy da bir álem chempıonatynda eki penaltıdi qaıtarǵan.
Ekinshi taımda Argentına sapynan Aleksıs Makallıster (49-mınýt) men Hýlıan Alvares (69) mergendigimen kózge túsip, Argentınany kelesi kezeńge shyǵardy. Osylaısha, alǵashqy týrda Saýd Arabııasynan jeńilgen argentınalyqtar keıingi eki matchta alty upaı oljalap, ol jeńilistiń kezdeısoq ekenin dáleldedi. Al Polsha 1986 jylǵy álem birinshiliginen keıin alǵash ret mýndıaldyń pleı-off satysyna joldama aldy.
Qatardyń 500 myńǵa jýyq turǵyny bar Lýsaıl qalasynda ornalasqan «Lýsaıl Aıkonık» stadıonyndaǵy ekinshi matchta Saýd Arabııasy alǵashqy týrdaǵydaı sensasııa jasaı almady. Arabtardyń birinshi týrdaǵy iri jeńisinen kópshilik jankúıer olardy bul topta ekinshi orynmen kelesi kezeńge shyǵady dep boljaǵan edi. Biraq ekinshi týrda Polshadan utylǵan olar sońǵy týrda da Meksıkadan jeńilip qaldy – 2:1.
Eki eldiń fýtbolshylary birinshi taımda bir-biriniń qaqpasyna gol soǵa almaǵanymen, jankúıerler ekinshi taımda úsh goldyń kýási boldy. Meksıka sapynan 48-mınýtta Enrı Martın, 52-mınýtta Lýıs Chaves mergendigimen kózge tústi. Al matchtyń sońǵy mınýtynda Saýd Arabııasy quramasynan Sálem Ál Davsarı nysanany dál kózdep, osy matchtaǵy jáne óz quramasynyń álem birinshiligindegi sońǵy golyn soqty. Bir qyzyǵy, «Lýsaıl Aıkonık» stadıonyndaǵy matchtarda quramalar úsh goldan artyq dop soǵa almaı jatyr. Máselen, bul arena búginge deıin álem chempıonatynyń bes matchyn qabyldasa, sonyń ekeýinde – 2:1, qalǵan úsh matchta 2:0 esebi tirkelgen eken.
Al S tobyndaǵy jalǵyz joldamany Aýstralııa men Danııa quramalary sarapqa salyp, «jasyl qurlyq» ókilderi qatarynan besinshi ret álem chempıonatynyń pleı-off kezeńine joldama aldy – 1:0. Kezdesýdiń taǵdyryn sheshken jalǵyz goldy ekinshi taımnyń 61-mınýtynda Metıý Lekı saldy. Jasyratyny joq, eki týrda bir-aq upaı jınaǵan Danııaǵa qaraǵanda bir jeńisi bar aýstralııalyqtardyń kelesi kezeńge shyǵý múmkindigi joǵary edi. Dese de, dańqty bapker Kasper Iýlmann jetekshilik etetin Danııa quramasy qarsylataryn tek iri eseppen jeńgen jaǵdaıda ǵana 1/8 fınalǵa joldama alatyn. О́kinishke qaraı, Danııa fýtbolshylary 90 mınýt boıy dopqa ıelik etip, Mettıý Raıan qaqpasyna 13 ret soqqy jasaǵanymen, onyń birde-birin golǵa aınaldyra almady. Al kóbirek qorǵanysqa kóńil bólip, qarsy shabýylǵa ıek artqan Azııa qurlyǵynyń ókilderi bir ǵana múmkindigin tıimdi paıdalanyp, Kasper Shmeıhel qorǵaǵan qaqpadan sańylaý tapty. 2018 jylǵy álemdik dodanyń 1/8 kezeńine shyqqan Danııa bıyl sol jetistigin qaıtalaı almaı, pushaıman boldy.
Kelesi kezeńniń joldamasyn merziminen buryn sheship qoıǵan Fransııa Týnıs quramasymen ótken oıynda alańǵa ekinshi quramnyń fýtbolshylaryn shyǵardy. Dıde Desham osy arqyly negizgi quramdy mańyzdy matchtar aldynda bir tynyqtyryp alsa, alańǵa az shyǵyp júrgen fýtbolshylarǵa taǵy bir múmkindik berdi. Áıtse de, álem chempıony deıtin dardaı ataǵy bar Fransııa quramasynda osal fýtbolshynyń bolmaıtyny túsinikti ǵoı. Biraq keshegi matchta olardyń kúshi Týnısti tize búktirýge jetpedi. 58-mınýttaǵy Vahbı Hazrıdiń goly Týnıske jeńis syılaǵanymen, kelesi kezeńge shyǵýǵa jetkiliksiz boldy. 90+8 mınýtta Fransııa sapynan Antýan Grızmann tarazy basyn teńestirgen edi. Biraq gol soǵylǵan sátti vıdeo qaıtalaýdan kórgen tóreshi goldy esepke alǵan joq.
Osylaısha, S jáne D toptarynyń úshinshi týr matchtarynan keıin týrnırdiń 1/8 fınalyna shyqqan taǵy tórt qurama anyqtaldy. Sóıtip, 3 jeltoqsanda ótetin pleı-off básekesinde Argentına Aýstralııamen, 4 jeltoqsandaǵy matchta Polsha Fransııamen kezdesetin boldy.
Sondaı-aq keshe E tobyndaǵy eki joldamany Japonııa men Ispanııa, Kosta-Rıka men Germanııa quramalary, F tobynda Horvatııa men Belgııa, Kanada men Marokko sarapqa saldy. Al búgin jankúıerler G tobyndaǵy Kamerýn – Brazılııa, Serbııa – Shveısarııa jáne H tobyndaǵy Koreıa – Portýgalııa, Gana – Ýrýgvaı quramalarynyń oıyndaryn tamashalaıdy. Osy matchtarmen bıylǵy álem birinshiliginiń toptyq kezeńindegi básekeler aıaqtalsa, senbi kúni 1/8 fınal matchtary bastalady.