Memleket basshysy Qasym-Jomart Toqaev Astanaǵa resmı saparmen kelgen Grekııanyń Syrtqy ister mınıstri Nıkolaos Dendıasty qabyldady, dep habarlaıdy Egemen.kz Aqordaǵa silteme jasap.
Kezdesý barysynda saýda-ekonomıkalyq baılanystardy nyǵaıtýǵa basa mán berilip, Qazaqstan men Grekııa arasyndaǵy yntymaqtastyqty damytý perspektıvalary talqylandy.
Qasym-Jomart Toqaev Grekııanyń Eýropalyq Odaqqa múshe memleketter arasynda mańyzdy seriktes elderdiń biri ekenin atap ótti. Sondaı-aq eki el kópjaqty alańdarda ózara tyǵyz qarym-qatynas jasap kele jatqanyn aıtty.
«Grekııamen aradaǵy baılanystar biz úshin basymdyq sanalatynyn taǵy da atap ótkim keledi. Biz ózara yntymaqtastyq kórsetkishterin jańa deńgeıge kóterý úshin qoldan kelgenniń bárin jasaımyz», dedi Prezıdent.
Nıkolaos Dendıas ekijaqty jáne kópjaqty yntymaqtastyq máseleleri jóninde pikir almasýǵa múmkindik bergeni úshin Qasym-Jomart Toqaevqa alǵys aıtty.
«Biz Qazaqstandy óńirdegi turaqtylyqqa kepil bolatyn Ortalyq Azııadaǵy eń iri jáne basymdyqqa ıe el retinde qarastyratynymyzdy atap ótkim keledi. Grekııa Sizdiń elińizben ózara tıimdi yntymaqtastyqty odan ári nyǵaıtýǵa daıyn», dedi mınıstr.
Áńgime barysynda taraptar halyqaralyq jáne óńirlik kún tártibindegi ózekti máseleler jóninde pikir almasty.