Ulytaý oblysynyń Jezdi jáne Talap aýyldarynda balalarǵa arnalǵan qaıyrymdylyq sport zaldary ashyldy, dep habarlaıdy Egemen.kz.
Zaldar «Qazaqstan halqyna» qoǵamdyq qorynyń «24 balalar sport zaly» qaıyrymdylyq jobasy aıasynda jaraqtandyryldy.
Eki zal orta mektepterdiń ǵımaratynda ashyldy. Osyǵan deıin aýyldarda sportpen aınalysý úshin qajetti zamanaýı oryn bolmady. Endi jergilikti balalar «qazaqsha kúres», boks syndy seksııalaryna turaqty qatysýyna múmkindik aldy.
«Zalda barlyq qajetti sport quraldary bar. Bizge arnaıy forma berildi. Men birinshi ret qatysyp jatyrmyn. Qýanyshtymyn! Jezdiden shyqqan balalar chempıon bolady», deıdi Jezdi aýylyndaǵy orta mektep oqýshysy Nııaz Qanatbek.
«Qazaqstan halqyna» qory baǵdarlamany seriktesi «Batyr bolamyn!» qoǵamdyq qorymen iske asyrýda.
«Aýyl – elimizdiń altyn besigi. Sondyqtan aýyldy jerde balalar úshin sportpen shuǵyldanýǵa jaǵdaı jasaý, adamgershilik tárbıeni qalyptastyrý mańyzdy. Sonymen qatar biz jattyqtyrýshylardyń biliktiligin arttyrý maqsatynda oqytý jáne tájirıbe almasý júrgizýdi maqsat etip otyrmyz», dep atap ótti ashylý saltanatynda «Batyr bolamyn!» qoǵamdyq qorynyń vıse-prezıdenti Ernur Sabykenuly.
«Qazaqstan halqyna» qorynyń júzege asyryp jatqan «24 balalar sport zaly» jobasynyń maqsaty – elimizdiń shalǵaıdaǵy eldi mekenderinde nemese sportqa qoljetimdilik deńgeıi tómen aýyldyq jerlerde balalar sportynyń qoljetimdiligin arttyrý. Jobanyń maqsatty aýdıtorııasy – az qamtylǵan jáne kópbalaly otbasylardan shyqqan 5 jastan 18 jasqa deıingi balalar, sondaı-aq damý ereksheligi (ınklıýzıvtiligi) bar balalar.
Aıta keteıik, 24 zaldy ashýǵa arnalǵan qaıyrymdylyq baǵdarlamasynyń bıýdjeti – 183 623 000 teńge. Búgingi tańda elimiz boıynsha 11 zal ashylǵan.